Border News Agency
ကနေဒါ၊ဇွန် ၄။
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) ကိုယ်စားလှယ်အဖွဲ့ဟာ ကနေဒါနိုင်ငံခရီးစဉ်အတွင်း မြို့တော်အိုတာဝါမှာ ကနေဒါအစိုးရ၊ လွှတ်တော်တာဝန်ရှိသူတွေနဲ့တွေ့ဆုံဆွေးနွေးခဲ့ပါတယ်။
အဲဒီတွေ့ဆုံမှုအတွင်း ကနေဒါနိုင်ငံခြားရေးဝန်ကြီးရဲ့ ပါလီမန်ရေးရာအတွင်းဝန် ရောဘတ်အိုလီဖန့်က ကနေဒါနိုင်ငံအနေနဲ့ ငြိမ်းချမ်းပြီး အားလုံးပါဝင်နိုင်တဲ့ အနာဂတ်ကို ကြိုးပမ်းနေတဲ့ မြန်မာပြည်သူတွေနဲ့အတူ အခိုင်အမာရပ်တည်တယ်လို့ ပြောကြားခဲ့ပါတယ်။
လူသားချင်းစာနာမှုဆိုင်ရာအကူအညီတွေ အတားအဆီးမရှိ ဝင်ရောက်နိုင်ဖို့ တိုက်ခိုက်မှုတွေကို ချက်ချင်းရပ်တန့်ဖို့ အရေးတကြီးလိုအပ်ပြီး SCEF အဖွဲ့ကလည်း ကောင်စီရဲ့ ရည်ရွယ်ချက်၊လုပ်ငန်းတွေနဲ့ မြန်မာ့လက်ရှိအခြေအနေတွေကို ပြန်လည်ရှင်းလင်းဆွေးနွေးခဲ့ပါတယ်။
SCEF ကိုယ်စားလှယ်အဖွဲ့ဟာ ဒီမိုကရက်တစ်မြန်မာနိုင်ငံရဲ့ ပါလီမန်မိတ်ဆွေများအဖွဲ့ဝင် လွှတ်တော်အမတ်တွေဖြစ်ကြတဲ့ ဂါနက်ဂျီးနီယက်၊ အဒမ်ချိန်ဘာတို့နဲ့လည်း တွေ့ဆုံခဲ့ပြီး အရပ်သားတွေအပေါ် အကြမ်းဖက်မှုအဆုံးသတ်ရေးနဲ့ တရားဥပဒေစိုးမိုးရေးကိစ္စတွေကို ဆွေးနွေးခဲ့သလို၊ အိုတာဝါမြို့ရှိ အရပ်ဖက်အဖွဲ့အစည်းတွေနဲ့လည်း လူသားချင်းစာနာမှုအကူအညီပေးရေးကိစ္စတွေကို ဆက်လက်ဆွေးနွေးခဲ့ပါတယ်။
အဲဒီ SCEF ကိုယ်စားလှယ်အဖွဲ့မှာ အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်၊ကရင်နီပြည်ကြားကာလအုပ်ချုပ်ရေးကောင်စီမှ နဲနယ်ပလို၊ ကရင်အမျိုးသားအစည်းအရုံး (KNU) မှ စောနီးမရော့ဒ်တို့ ပါဝင်ပြီး NUG သမ္မတအကြံပေး ဦးကျော်ဇော်လည်း ပါဝင်တက်ရောက်ခဲ့ပါတယ်။
ဒါ့အပြင် အဖွဲ့အနေနဲ့ တိုရန်တိုတက္ကသိုလ်မှ ပညာရှင်တွေနဲ့ တွေ့ဆုံခဲ့သလို ကနေဒါရောက် မြန်မာနွယ်ဖွားတွေနဲ့လည်း တောင်းဟော လူထုတွေ့ဆုံပွဲတွေ ပြုလုပ်ခဲ့ပါတယ်။
