Border News Agency
ချွန်ဘူရီ၊ ဇူလိုင် ၆ ။
ထိုင်းနိုင်ငံ၊ ချွန်ဘူရီပြည်နယ်၊ သီရာချာခရိုင်မှာ မိုးသည်းထန်စွာရွာသွန်းပြီး စက်ရုံတရုံက စွန့်ပစ်ဖော့ချပ်တွေ ရွာထဲမျောပါသွားရာကနေ အာဏာပိုင်တွေ ဝင်ရောက်စစ်ဆေးရာမှာ တရားမဝင်မြန်မာလုပ်သားဆယ်ဦး ဖမ်းဆီးခံခဲ့ရပါတယ်။
အဲဒီစက်ရုံဟာ သုံးပြီးသားရေခဲသေတ္တာတွေကို ဖျက်ဆီးပြီးအစိတ်အပိုင်းတွေ ပြန်ထုတ်တဲ့လုပ်ငန်းဖြစ်ပြီး ဖျက်ဆီးရာကထွက်လာတဲ့ စွန့်ပစ်ဖော့ချပ်အများအပြားကို စက်ရုံဝင်းထဲမှာ စုပုံထားခဲ့တာဖြစ်ပါတယ်။
ဇူလိုင် ၄ ရက်နေ့ကမိုးသည်းထန်စွာရွာသွန်းပြီး စက်ရုံခြံစည်းရိုးတံတိုင်းပြိုကျခဲ့တာကြောင့် စုပုံထားတဲ့ဖော့ချပ်တွေဟာရေနဲ့အတူအနီးအနားက ရွာထဲမျောပါသွားပြီး လမ်းတွေပေါ်ပြည့်သွားကာ အိမ်နဲ့ကားတချို့ပျက်စီးခဲ့ရပါတယ်။
အဲဒီနောက် ဇူလိုင်လ ၅ ရက်နေ့မှာ အာဏာပိုင်တွေကစက်ရုံကို ဝင်ရောက်စစ်ဆေးခဲ့ရာ စက်ရုံရှိအလုပ်သမားလေးဆယ်သုံးဦးထဲကနေ အထောက်အထားမရှိဘဲတရားမဝင် အလုပ်လုပ်ကိုင်နေတဲ့ မြန်မာလုပ်သားဆယ်ဦးကို စစ်ဆေးတွေ့ရှိပြီးဖမ်းဆီးခဲ့တာဖြစ်ပါတယ်။
အဲဒီစက်ရုံပိုင်ရှင်ကို တရားမဝင်အလုပ်သမားခန့်အပ်မှုနဲ့ အမှုဖွင့်ထားပြီး ဖမ်းဆီးခံရတဲ့မြန်မာလုပ်သားတွေကိုလည်း ဥပဒေအရအရေးယူထားတယ်လို့ သိရပါတယ်။
