Border News Agency
မြောက်ဦး၊ ဇူလိုင် ၁၅။
မြောက်ဦးမြို့နယ်အတွင်း မိုးဆက်တိုက်ရွာသွန်းပြီး ရေကြီး၊ ရေလျှံမှုကြောင့် စားဝတ်နေရေးအခက်အခဲကြုံနေရတဲ့ စစ်ရှောင်စခန်းနှစ်ခုကို ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က စားနပ်ရိက္ခာတွေ ကူညီထောက်ပံ့ပေးခဲ့ပါတယ်။
အဲဒီရေဘေးသင့်စစ်ရှောင်စခန်းနှစ်ခုမှ အိမ်ထောင်စုတရာ့နှစ်ဆယ့်သုံးစုအတွက် ဆန်၊ ဆီ၊ ဆားနဲ့ ငါးခြောက်အပါအဝင် အရေးပေါ်လိုအပ်တဲ့ပစ္စည်းတွေကို ဇူလိုင်လ ၁၄ ရက်နေ့က ထောက်ပံ့ပေးခဲ့တာဖြစ်ပါတယ်။
အာရက္ခအစိုးရအနေနဲ့ ရေဘေးအန္တရာယ်ကြုံတွေ့ခဲ့ရတဲ့ ဒေသခံပြည်သူတွေနဲ့စစ်ဘေးရှောင်တွေအတွက် အရေးပေါ်ကယ်ဆယ်ရေးနဲ့ရိက္ခာထောက်ပံ့ရေးလုပ်ငန်းတွေကိုလုပ်နေပါတယ်။
အဲဒီအပြင် ရေဘေးသင့်ဒေသတွေမှာ ကျန်းမာရေးစောင့်ရှောက်မှုပေးတာနဲ့ မြို့ရွာပြန်လည်သန့်ရှင်းရေးလုပ်ငန်းတွေကိုပါ ပြည်သူတွေနဲ့အတူ ပူးပေါင်းဆောင်ရွက်ပေးနေပါတယ်။
