Border News Agency
ထိုင်း၊သြဂုတ် ၁၁။
ထိုင်းနိုင်ငံ၊ ရယောင်းခရိုင်၊ ဘန်းချန်းမြို့နယ်မှာရှိတဲ့ တရုတ်ရင်းနှီးမြှုပ်နှံမှု ဒေတာစင်တာဆောက်လုပ်ရေးလုပ်ကွက်ကို သက်ဆိုင်ရာပူးပေါင်းအဖွဲ့တွေက ဩဂုတ်လ ၁၁ ရက်၊ဒီနေ့မှာ ရှောင်တခင်ဝင်ရောက်စစ်ဆေးခဲ့ပါတယ်။
အဲဒီလုပ်ကွက်မှာ တရားမဝင်ရွှေ့ပြောင်းလုပ်သားတွေ လာရောက်လုပ်ကိုင်နေကြောင်း သတင်းတိုင်ကြားချက်အရ စစ်ဆေးရေးအဖွဲ့တွေက ရှောင်တခင်ဝင်ရောက်ဖမ်းဆီးခဲ့တာပါ။
စစ်ဆေးရေးအဖွဲ့ ရောက်လာချိန်မှာ အလုပ်သမားလေးရာကျော်ဟာ နီးစပ်ရာချောင်းထဲခုန်ဆင်းတာအပါအဝင် နည်းလမ်းမျိုးစုံနဲ့ ထွက်ပြေးခဲ့ကြပေမယ့် တရားမဝင် မြန်မာနှစ်ဆယ်ဦးနဲ့ တရုတ်လေးဦး၊ စုစုပေါင်းနှစ်ဆယ့်လေးဦးကို ဖမ်းဆီးရမိခဲ့ပါတယ်။
ဖမ်းဆီးရမိသူနှစ်ဆယ့်လေးဦးလုံးဟာ တရားဝင်အလုပ်လုပ်ကိုင်ခွင့်ကတ်ပြားမရှိကြတာကြောင့် ဘန်းချန်းမြို့မရဲစခန်းကိုပို့ဆောင်ပြီး တရားဥပဒေအတိုင်း အရေးယူကာ ပြည်နှင်ဒဏ်ပေးဖို့ ဆောင်ရွက်နေပါတယ်။
