Border News Agency
ထိုင်း၊ဩဂုတ် ၂၉။
ထိုင်းနိုင်ငံ၊ရနောင်းမြို့မှာရှိတဲ့ ဂိုဒေါင်တခုကို ထိုင်းအကောက်ခွန်စုံစမ်းစစ်ဆေးရေးနဲ့ နှိမ်နင်းရေးတာဝန်ရှိသူတွေက ရှာဖွေဝရမ်းနဲ့ ဝင်ရောက်စီးနင်းရာမှ မြန်မာနိုင်ငံဆီပို့ဆောင်မယ့် ဘတ်ငွေ ၁၄၉ သန်းခန့်တန်ဖိုးရှိပစ္စည်းတွေကို သြဂုတ်လ ၂၈ ရက်နေ့က ဖမ်းဆီးရမိခဲ့ပါတယ်။
အဲဒီစီးနင်းဖမ်းဆီးမှုအတွင်း ဂိုဒေါင်ထဲမှ ဒီဇယ်ဂျင်ရေတာတွေ၊ မော်တော်ယာဉ်နဲ့ စက်ဘီးအပိုပစ္စည်းတွေ၊ အင်ဂျင်ဝိုင်၊ လျှပ်စစ်ပစ္စည်းတွေ၊ ဝါယာကြိုးခွေတွေအပြင် အလှကုန်နဲ့ ဆေးဝါးတွေအပါအဝင် ပစ္စည်းအမျိုးပေါင်း ၅၃၀,၀၀၀ ကျော်ကို သိမ်းဆည်းရမိခဲ့တာပါ။
အဲဒီပစ္စည်းတွေကို ဩဂုတ်လ ၁၇ ရက်နေ့ကတည်းက ထိုင်းအာဏာပိုင်တွေကစတင်ဖမ်းဆီးထားတာဖြစ်ပြီး သိုလှောင်ခွင့်ပြုထားတဲ့ ကာလထက်ကျော်လွန်ရင် အခွန်ရှောင်ပစ္စည်းအဖြစ်သတ်မှတ်ကာ ၂၀၁၇ ထိုင်းအကောက်ခွန်ဥပဒေနဲ့ အရေးယူဆောင်ရွက်သွားဖို့ စီစဉ်နေပါတယ်။
ဒါပေမယ့် ပစ္စည်းပိုင်ရှင်တွေဘက်က အခွန်လာရောက်ဆောင်နိုင်ဖို့အတွက် သတ်မှတ်ထားတဲ့ကာလအထိ စောင့်ဆိုင်းပေးသွားမှာဖြစ်ကြောင်းနဲ့ အဲဒီပစ္စည်းတွေဟာမြန်မာနိုင်ငံဘက်ဆီတင်ပို့မယ့် ပစ္စည်းတွေဖြစ်တယ်လို့ ထိုင်းသတင်းဌာနတွေမှာ ဖော်ပြထားပါတယ်။
အဲဒီကုန်စည်တွေဟာ ဂိုဒေါင်မှာသိုလှောင်ထားတဲ့ သတ်မှတ်ရက်မကျော်လွန်သေးသလို ထိုင်းနိုင်ငံအတွင်းဝယ်ယူစဉ်ကတည်းက အခွန်ဆောင်ပြီးသား ပစ္စည်းတွေဖြစ်တယ်လို့ ကုန်သည်တွေကဆိုကြပါတယ်။
