Border News Agency
နီပေါ၊ ဩဂုတ် ၃၁။
နီပေါနဲ့ တရုတ်နယ်စပ်ဒေသမှာဖြစ်ပွားခဲ့တဲ့ ပြင်းထန်တဲ့ရုတ်တရက်ရေကြီးရေလျှံမှုကြောင့် သေဆုံးသူ ၇၅၀ အထိ ရှိလာပြီး ၃,၀၀၀ ကျော်ပျောက်ဆုံးနေဆဲဖြစ်ရာ သေဆုံးသူများပြားတဲ့အတွက် အမှတ်အသားမသိရသေးတဲ့ ရုပ်အလောင်းတွေကို စုပေါင်းမြှုပ်နှံမှုတွေစတင်ပြုလုပ်နေပြီလို့ ရိုက်တာသတင်းမှာ ဖော်ပြထားပါတယ်။
ဘေးသင့်ဒေသ ရာဆူဝါရဲ့ ဝေးကွာတဲ့မြစ်ဝှမ်းဒေသတွေကနေ မျောပါလာတဲ့ရုပ်အလောင်းတွေကို ကီလိုမီတာ ၂၀၀ ခန့်အကွာမှာရှိတဲ့ ချစ်တဝမ်ခရိုင်၊ ဒေ့ဗ်ဂတ်သစ်တောအတွင်း မြေကျင်းရာပေါင်းများစွာတူးပြီး စုပေါင်းမြှုပ်နှံပေးနေတာဖြစ်ပါတယ်။
အဲဒီရုပ်အလောင်းတွေဟာ ရေထဲမှာရက်အတန်ကြာမျောပါခဲ့တာကြောင့် စိစစ်မရနိုင်အောင် ပုပ်ပွနေပြီး အများပြည်သူကျန်းမာရေးထိခိုက်နိုင်တဲ့အတွက် စနေနေ့ သြဂုတ်လ ၂၉ ရက်နေ့ကအလောင်း ၉၆ လောင်းနဲ့ သြဂုတ်လ ၃၀ ရက်မှာ အလောင်း ၁၀၀ ကျော်ကို အမြန်ဆုံးစုပေါင်းမြှုပ်နှံခဲ့ရတာပါ။
နီပေါအာဏာပိုင်တွေအနေနဲ့ နောင်မှာ မိသားစုတွေလာရောက်ရှာဖွေရင် DNA စစ်
ဆေးပြီး ပြန်လည်ဖော်ထုတ်နိုင်ဖို့အတွက် အလောင်းတခုစီရဲ့ သဲလွန်စ၊ဓာတ်ပုံ၊နေရာမှတ်တမ်းနဲ့ DNA နမူနာတွေကို စနစ်တကျရယူမှတ်တမ်းတင်ထားကြပါတယ်။
အဲဒီဒေသတွေကို အိန္ဒိယနိုင်ငံမှ မှုခင်းဆေးပညာအဖွဲ့တဖွဲ့ရောက်ရှိလာပြီး နီပေါအဖွဲ့တွေနဲ့အတူ DNA ဓာတ်ခွဲစစ်ဆေးတာတွေကိုကူညီဆောင်ရွက်ပေးနေသလို တရုတ်နိုင်ငံက အကူအညီပေးရေးအဖွဲ့နဲ့လည်း ပူးပေါင်းဆောင်ရွက်နေပါတယ်။
