Border News Agency
ရွေကူ၊ ဩဂုတ် ၃၁။
ကချင်ပြည်၊ရွှေကူမြို့နယ်ဘက်ကိုဆန်တက်လာတဲ့ အာဏာသိမ်းစစ်တပ်ရဲ့ စစ်သင်္ဘောတွေကိုကချင်လွတ်လပ်ရေးတပ်မတော်( KIA )နဲ့ ပြည်သူ့ကာကွယ်ရေးတပ်(PDF)ပူးပေါင်းတပ်တွေက ဩဂုတ်လ ၂၇ ရက်နဲ့ ၂၉ ရက်နေ့ကတိုက်ခိုက်ခဲ့တာကြောင့် စစ်သင်္ဘောတစီးသိမ်းပိုက်ရရှိခဲ့ပြီး နောက်တစီးမီးလောင်ပျက်စီးခဲ့ပါတယ်။
ဧရာဝတီမြစ်အတိုင်း ကသာကနေ ရွှေကူဘက်ကို ဆန်တက်လာတဲ့စစ်သင်္ဘောတွေကို ဩဂုတ်လ ၂၇ ရက်နေ့က တိုက်ခိုက်ခဲ့တာကြောင့် ထိခိုက်ပျက်စီးသွားပြီး ဘိုကုန်းကျေးရွာမှာ အစောင့်တပ်စိတ်နဲ့ ချန်ထားခဲ့တဲ့စစ်သင်္ဘောတစီးကို သွားရောက်ရှင်းလင်းချိန် အစောင့်တွေထွက်ပြေးသွားတဲ့အတွက် သိမ်းပိုက်ရရှိခဲ့တာပါ။
အဲဒီနောက်ရွှေကူကနေ ဗန်းမော်ဘက်ကို ဆက်လက်ဆန်တက်လာတဲ့ စစ်သင်္ဘောတွေကို ဩဂုတ်လ ၂၉ ရက်မှာ ထပ်မံတိုက်ခိုက်ခဲ့ရာ သင်္ဘောတစီးမီးလောင်ပျက်စီးခဲ့ပြီး အရာရှိတွေအပါအဝင် အာဏာသိမ်းစစ်တပ်ဘက်က အများအပြားသေဆုံးခဲ့တယ်လို့ ဒေသစစ်ရေးသတင်းရင်းမြစ်တွေကဆိုပါတယ်။
မြစ်ကြောင်းတလျှောက်နဲ့ ရွှေကူမြို့နယ်အတွင်း စစ်သင်္ဘောတွေတိုက်ခိုက်ခံရသလို မြေပြင်တိုက်ပွဲတွေမှာပါတပ်မမှူး၊ တပ်ရင်းမှူးအဆင့်ရှိတဲ့ အရာရှိတွေအပါအဝင် အာဏာသိမ်းစစ်တပ်ဘက်က သေဆုံးထိခိုက်မှုများပြားခဲ့တာပါ။
အဲဒီအပြင် ဩဂုတ်လ ၂၄ ရက်နဲ့ ရက်ပိုင်းတွေကလည်း စစ်မှုထမ်းတပ်သားတွေပါဝင်တဲ့ စစ်ကြောင်းတွေနဲ့ စစ်သင်္ဘောလုံခြုံရေးစက်လှေတွေကို KIA နဲ့ PDF ပူးပေါင်းတပ်တွေက တိုက်ခိုက်ခဲ့တာကြောင့် အာဏာသိမ်းစစ်တပ်ဘက်ကထိခိုက်သေဆုံးမှုများပြားခဲ့ပါတယ်။
