Border News Agency
ထိုင်း၊ ဩဂုတ် ၃၁။
ထိုင်းနိုင်ငံ ၊ချင်းရိုင်ခရိုင်၊ မယ်ဆိုင်မြို့နယ် နယ်စပ်တနေရာမှာ ဩဂုတ်လ ၃၁ရက်၊ဒီနေ့ မြန်မာဘက်မှပို့တဲ့ မူးယစ်ဆေးဝါးတွေကိုထိုင်းအထူးတပ်ဖွဲ့ကဖမ်းမိခဲ့ပါတယ်။
နယ်စပ်တပ်ဖွဲ့ဖြစ်တဲ့ဖမောင်းတပ်ဖွဲ့ဟာ မယ်ဆိုင်မြို့နယ်၊ ဝိန်းဖန်ခမ်ကျေးရွာအုပ်စု၊ မယ်ဆိုင်ကျေးရွာအနီးကင်းလှည့်နေစဉ် လူ ၆ ဦးခန့်ပါဝင်တဲ့အုပ်စုတစုဟာ မြန်မာဘက်မှအိတ်တွေကို ကားတစီးပေါ်သို့ တင်ဆောင်နေတာကို တွေ့ခဲ့တာဖြစ်ပါတယ်။
မယ်ဆိုင်မြစ်ကိုဖြတ်ကျော်ပြီး ထိုင်းနိုင်ငံအတွင်းသို့ သယ်ဆောင်ဖို့ကြိုးပမ်းနေစဉ် မူးယစ်ဆေးဝါးမှောင်ခိုဂိုဏ်းနဲ့ ဖမောင်းတပ်ဖွဲ့တို့ပစ်ခတ်မှုဖြစ်ပွားခဲ့ပြီးနောက် မူးယစ်ဆေးဝါးတွေကို သိမ်းဆည်းရမိခဲ့တာပါ။
အခင်းဖြစ်ပွားရာနေရာကိုစစ်ဆေးရာမှာ အလေးချိန် စုစုပေါင်း ၁၅၀ ကီလိုဂရမ်ရှိ အဆင့် ၂ မူးယစ်ဆေးဝါး အမျိုးအစားဖြစ်တဲ့ ကက်တမင်း (Ketamine) ကို တွေ့ရှိခဲ့တာဖြစ်ပါတယ်။
ဖမောင်းအထူးတပ်ဖွဲ့ဟာ သက်ဆိုင်ရာဌာနတွေနဲ့ပူးပေါင်းပြီး အခင်းဖြစ်ပွားရာနေရာသို့သွားရောက်ကာ သိမ်းဆည်းရရှိတဲ့ သက်သေခံပစ္စည်းတွေကို ဥပဒေအတိုင်းအရေးယူဖို့ မယ်ဆိုင်မြို့နယ်ရဲစခန်းသို့လွှဲပြောင်းပေးထားပါတယ်။
လက်ရှိမှာတာဝန်ရှိသူတွေက ပြစ်မှုကျူးလွန်သူတွေကို ဥပဒေအရအရေးယူနိုင်ဖို့အတွက် ဆက်လက်စုံစမ်းနေဆဲဖြစ်ပါတယ်။
