အင်တာဗျူး
Border News Agency
မြေပုံ၊စက်တင်ဘာ ၂၂။
အာရက္ခတပ်တော်(AA)ထိန်းချုပ်ထားတဲ့မြေပုံမြို့နယ်မှာ အသက်မပြည့်သေးသူတွေအပါအဝင် ဒေသခံပြည်သူတွေကို အာရက္ခတပ်တော်က အတင်းအဓမ္မစစ်မှုထမ်းခေါ်ယူနေတယ်လို့ မိဘတွေ၊မိသားစုဝင်တွေနဲ့ဒေသခံတွေက အတည်ပြုပြောကြပါတယ်။
အဲဒီမြေပုံမြို့နယ်၊ ကမ်းသာယာကျေးရွာအုပ်စု၊ငပသုန်ကျေးရွာရှိ အသက်တဆယ့်ရှစ်နှစ်မပြည့်သေးသူတွေအပါအဝင် ကျေးရွာရှိလူငယ်လူရွယ်တရာကျော်ထဲကအများစုကို အာရက္ခတပ်တော်က အတင်းအဓမ္မစစ်မှုထမ်းခေါ်ယူသွားတာလို့ မိသားစုဝင်တွေကဆိုကြပါတယ်။
အဲဒီအထဲမှာ အသက်တဆယ့်ရှစ်နှစ်မပြည့်သေးသူတွေအပါအဝင် မိန်းကလေးငယ်တွေ၊အမျိုးသမီးတွေလည်းပါဝင်သွားကြတယ်လို့ မိဘတွေကဆိုကြပါတယ်။
အဲဒီမြေပုံမြို့နယ်၊ကမ်းသာယာကျေးရွာအုပ်စု၊ငပသုန်ကျေးရွာမှစစ်မှုထမ်းပါသွားသူအမျိုးသမီးတဦးရဲ့မိခင်ကို Border News Agency က ဆက်သွယ်မေးထားပါတယ်။
“အခုလိုခေါ်သွားတဲ့ထဲကျမရဲ့အမြင်မှာဆို လူတရာ့ငါးဆယ်လူပျိုအပျိုထဲ သူတို့ကမဲနှိုက်ပြီး လူငါးဆယ်ဆိုငါးဆယ်၊တရာဆိုတရာကောက်တဲ့ပုံစံမျိုးမဟုတ်ဘဲ လူတရာ့ငါးဆယ်စလုံးကို အကုန်ခေါ်သွားတဲ့ပုံစံမျိုးနဲ့ခေါ်ယူသွားတာပါ။”
“ရှောင်တဲ့လူတွေကရှောင်သွားပြီး၊ မရှောင်တဲ့လူတွေကတော့ခုနှစ်ဆယ်နဲ့ရှစ်ယောက်ပါသွားပါတယ်။”
“အထက်လူကြီးတွေ လုပ်နေတာကတော့မှန်ပါတယ်။ဒါပေမယ့် လက်အောက်ငယ်သားတွေလုပ်နေတဲ့လမ်းစဉ်တွေကတော့ လွဲချော်နေတယ်လို့မြင်ပါတယ်။”
“ကိုယ့်လူမျိုးအချင်းချင်းစစ်မှုထမ်းခေါ်တာကိုလိုက်ရမယ်ဆိုတာကို နားလည်ပါတယ်။ဒါပေမယ့်အတိုင်းအတာတခုနဲ့သွားတာပိုမှန်တယ်လို့မြင်ပါတယ်။”
“ငပသုန်ရွာမှာဆိုရင် လူပျို၊အပျိုတရာကျော်ရှိတာကို တရာကျော်လုံးကိုခေါ်သွားတော့ ရွာလည်းပျက်သွားနိုင်တဲ့အခြေအနေရှိပါတယ်။”
“ငပသုန်ရွာမှာဆိုရင် လူပျို၊အပျိုတရာကျော်ရှိတဲ့ထဲ သုံးလေးဆယ်လောက်မဲနှိုက်ပြီးခေါ်သွားရင်တောင် ကျမတို့အနေနဲ့မပြောလိုပါဘူး။”
“လုပ်စဉ်လည်းမှန်ပါတယ်။ရွာသူရွာ သားသဘောထားကတော့ သူတို့မပြောရဲကြပါဘူး။ကြောက်ကြရပါတယ်။”
“တခုခုပြန်တုံ့ပြန်လိုက်ရင် ကိုယ့်သမီးကိုပြန်ပြီး တခုခုပြန်လုပ်မှာကိုစိုးရိမ်ကြပါတယ်။”
“ခဏတာမဟုတ်ဘဲ ရာသက်ပန်စစ်မှုထမ်းခိုင်းမှာကိုလည်းကြောက်ကြပါတယ်။”
“မိဘတွေက သားသမီးကိုမပိုင်တဲ့အခြေအနေဖြစ်နေကြပါတယ်။”
“စစ်မှုထမ်းခေါ်ထားတဲ့သူတွေကိုပြန်လွှတ်ပေးစေချင်တဲ့ပုံစံမျိုးမဟုတ်ပါဘူး။”
“နေမကောင်းတဲ့သူတွေနဲ့ မိဘကိုလုပ်ကျွေးနေတဲ့သူတွေကို ဆိုင်းငံ့ပေးစေချင်တဲ့သဘောမျိုးပါ။”
“စစ်မှုမထမ်းမနေရဆိုတာကိုလည်း ကျမတို့အကုန်နားလည်ပါတယ်။”
“ရခိုင်ပြည်မှာနေတယ်ဆိုရင်တော့ စစ်မှုထမ်းကြရပါမယ်။”
“အသက်ဆယ့်ရှစ်ပြည့်ရင် စစ်မှုထမ်းရမယ်ဆိုတာကိုလည်း ကျမတို့ကနားလည်ပြီးသားပါ။”
“နေမကောင်းတဲ့သူတွေနဲ့မိဘကိုလုပ်ကျွေးနေတဲ့သူတွေကို ဆိုင်းငံ့ပေးစေချင်တာပါ။တဖြတ်ပြီးတဖြတ်ခေါ်ယူစေချင်တာပါ။”
“ရခိုင်ပြည်မှာနေတယ်ဆိုရင်တော့ စစ်မှုထမ်းကြရမယ်ဆိုတာလည်း နာလည်ပါတယ်။ရခိုင်ပြည်လွတ်လပ်ရေးရဖို့အတွက်စစ်မှုထမ်းကြရပါမယ်။”
“စစ်လေ့ကျင့်ရေးကိုအားလုံးကတတ်ကျွမ်းထားရမယ်ဆိုတာကို ကျမတို့လည်းသိပါတယ်။”
“အခုလိုသူတို့ကခေါ်သွားရင် တဖက်မှာမိသားစုတွေက အခက်အခဲအကျပ်အတည်းအများကြီးဖြစ်သွားနိုင်တယ်ဆိုတာကိုကျမတို့က တင်ပြတာပါ။”
“အုပ်ချုပ်ရေးမှူးလည်း ပြောပိုင်ခွင့်မရှိတဲ့ပုံစံမျိုးကို ကျမမြင်ပါတယ်။တခြားမိဘတွေကတော့မပြောတော့ဘူးလို့ပြောပါတယ်။”
“ဒီကအုပ်ချုပ်ရေးမှူးတွေကို တိုက်နယ်မှူးကသိသွားပြီး ဆင်းလာမှာကိုလည်းကြောက်ရပါတယ်။”
“သူတို့မိဘတွေကတော့ အထက်ကိုသွားပြီး ဘယ်လိုဆွေးနွေးရမလဲဆိုတာကို တိုင်ပင်နေကြပါတယ်။”
