Border News Agency
မိုင်းလုံ၊ အောက်တိုဘာ ၁၀။
မိုင်းလုံမြို့နယ်၊ နမ့်ခုမ်အုပ်စု၊ မန်ဟုန်းကျေးရွာကို စစ်ကော်မရှင်တပ်လေကြောင်းတိုက်ခိုက်လို့ ပြည်သူတွေရဲ့နေအိမ်အများအပြားပျက်စီးသွားခဲ့ရတယ်လို့ တအာင်းတပ်မတော်က အောက်တိုဘာလ ၁၀ ရက်၊ ဒီနေ့ထုတ်ပြန်ပါတယ်။
စစ်ကော်မရှင်တပ်ဟာ ပြည်သူတွေရှိတဲ့နေရာကို ပြီးခဲ့တဲ့အောက်တိုဘာလ ၇ ရက်၊ နေ့လည် ၁၂ နာရီ ၃၀ မိနစ်အချိန်က ရွယ်ရည်ချက်ရှိရှိ လေကြောင်းတိုက်ခိုက်ခဲ့သလို လက်နက်ကြီးခြောက်လုံးထိပစ်ခတ်ခဲ့တယ်လို့ ဆိုပါတယ်။
အဲဒီလိုတိုက်ခိုက်ခဲ့တာကြောင့် အမျိုးသားငါးဦး၊ အမျိုးသမီးငါးဦးနဲ့ကလေးငယ်သုံးဦးသေဆုံးသွားသလို အမျိုးသမီးတဦးဒဏ်ရာရခဲ့တယ်လို့ဆိုပါတယ်။
အဲဒီအပြင် ပြည်သူတွေရဲ့နေအိမ်ခြောက်လုံးလည်း ပျက်စီးသွားတယ်လို့ ဆိုပါတယ်။
စစ်ကော်မရှင်တပ်ဟာ ပြည်သူတွေကိုသေစေချင်သလို မြို့အတွင်းပြည်သူတွေမနေရဲအောင် စစ်ရေးပစ်မှတ်မဟုတ်တဲ့ ပြည်သူလူထုနဲ့နေရာတွေကို လေကြောင်းနဲ့လက်နက်ကြီးကို အသုံးပြုပြီး စစ်ရာဇဝတ်မှုတွေပေါ်ပေါ်တင်တင်ကျူးလွန်နေတယ်လို့ဆိုပါတယ်။
စစ်ကော်မရှင်တပ်ဟာ တအာင်းပြည်အတွင်းသာမက တိုင်းရင်းသားလက်နက်ကိုင်တွေ၊ ပြည်သူ့ကာကွယ်ရေးတပ်ဖွဲ့တွေက သိမ်းပိုက်ရရှိထားတဲ့နေရာတွေကို လေကြောင်း၊ လက်နက်ကြီး၊ ဒရုန်းတွေနဲ့ အပြစ်မဲ့ပြည်သူတွေအပေါ် စစ်ရာဇဝတ်မှုတွေကျူးလွန်နေတယ်လို့ဆိုပါတယ်။
