Border News Agency
အီရန်၊ ဇွန် ၁၁။
ကမ္ဘာပေါ်ရှိ လူ ၇၀ မှာ ၁ ယောက်နှုန်း၊ စုစုပေါင်း လူပေါင်း ၁၁၇.၈ သန်းဟာ ပဋိပက္ခ၊ အကြမ်းဖက်မှုနဲ့ လူ့အခွင့်အရေး ချိုးဖောက်မှုတွေကြောင့် နေရပ်စွန့်ခွာ ထွက်ပြေးနေရတယ်လို့ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) က ဇွန်လ ၁၁ ရက်၊ ဒီနေ့ ထုတ်ပြန်လိုက်ပါတယ်။
ပြီးခဲ့တဲ့ ၁၀ နှစ်အတွင်း ပထမဆုံးအကြိမ်အဖြစ် အိုးအိမ်စွန့်ခွာသူအရေအတွက် အနည်းငယ်လျော့ကျလာခဲ့ပေမယ့် အမေရိကန်-အစ္စရေးနဲ့ အီရန်စစ်ပွဲကြောင့် လက်ဘနွန်နဲ့ အီရန်နိုင်ငံတို့မှာ ဒုက္ခသည်အကျပ်အတည်းတွေ အလျင်အမြန်တိုးပွားလာနေပါတယ်။
အဲဒီစစ်ပွဲကြောင့်ပဲ လူပေါင်း ၁ သန်းကျော်ဟာ လက်ဘနွန်မှာ အိုးအိမ်စွန့်ခွာခဲ့ရသလို အီရန်နိုင်ငံထဲမှာလည်း နောက်ထပ် ၃.၂ သန်းလောက် ပြည်တွင်းမှာ ရွှေ့ပြောင်းနေထိုင်နေကြရပါတယ်။
အိုးအိမ်စွန့်ခွာရသူ အများဆုံးထွက်ပေါ်လာတဲ့ နိုင်ငံတွေကတော့ ဗင်နီဇွဲလား ၆.၄ သန်း၊ ပါလက်စတိုင်း ၆ သန်း၊ ယူကရိန်း ၅.၂ သန်းနဲ့ ဆီးရီးယား ၄.၉ သန်းတို့ ဖြစ်ကြပါတယ်။
သူတို့ကို အဓိကလက်ခံထားရတဲ့နိုင်ငံတွေကတော့ ကိုလံဘီယာ၊ ဂျာမနီ၊ တူရကီ၊ ယူဂန်ဒါ၊ အီရန်၊ ချဒ်နဲ့ ပါကစ္စတန်နိုင်ငံတို့ ဖြစ်ပါတယ်။
တဖက်မှာလည်း ၂၀၂၅ ခုနှစ်အတွင်း နေရပ်ပြန်သူ ၁၄.၇ သန်းအထိ ရှိခဲ့တာဟာ UNHCR စံချိန်တင် အများဆုံးဖြစ်ပါတယ်။
ဒါပေမယ့် ပြန်သွားသူအများစုဟာ လုံခြုံမှုမရှိတဲ့ ဒေသတွေဆီပြန်နေရတာဖြစ်လို့ အခြေအနေကတော့ စိုးရိမ်စရာကောင်းနေဆဲဖြစ်တယ်လို့ UNHCR က သတိပေးထားပါတယ်။
