Border News Agency
ဂမ်ဘီယာ၊ ဇန်နဝါရီ ၂၀။
ဂမ်ဘီယာနိုင်ငံက ICJ တရားရုံးမှာ ကိုးကားတင်သွင်းထားတဲ့ စာရွက်စာတမ်းအထောက်အထားတွေဟာ ခိုင်လုံမှုမရှိတဲ့အပြင် ဘက်လိုက်မှုတွေရှိနေတယ်လို့ မြန်မာနိုင်ငံရဲ့ဦးဆောင်ရှေ့နေ Mr. Christopher Staker က တုံ့ပြန်ချေပလိုက်ပါတယ်။
ဂမ်ဘီယာဟာ အချက်အလက်ရှာဖွေရေးအဖွဲ့ (FFM) ရဲ့အစီရင်ခံစာတွေကိုသာ အပြီးသတ်စီရင်ပြီးသားအဖြစ် တရားရုံးကလက်ခံဖို့ တောင်းဆိုနေပေမယ့် တရားရုံးအနေနဲ့ နိုင်ငံရေးအဖွဲ့အစည်းတွေရဲ့ အချက်အလက်တွေအပေါ်မှာပဲ အခြေမခံသင့်ဘူးလို့ဆိုပါတယ်။
အဲဒီအပြင် ဂမ်ဘီယာရဲ့ သက်သေအများစုဟာ ဘင်္ဂလားဒေ့ရှ်ရှိဒုက္ခသည်စခန်းတွေကရတဲ့ တဆင့်စကား (Hearsay) တွေသာဖြစ်သလို အမည်အစစ်အမှန်ကိုဖုံးကွယ်ထားတာကြောင့် ယုံကြည်စိတ်ချရမှုမရှိဘူးလို့ သူကထောက်ပြခဲ့ပါတယ်။
အဲဒါကြောင့် တရားရုံးအနေနဲ့ မိမိရဲ့အချက်အလက် ရှာဖွေဖော်ထုတ်မှုဆိုင်ရာ တာဝန်တွေကို NGO သို့မဟုတ် နိုင်ငံရေးအဖွဲ့အစည်းတွေဆီ လွှဲပြောင်းပေးလို့မရဘဲ သတ်မှတ်ထားတဲ့သက်သေပြမှုစံနှုန်းတွေနဲ့အညီ ကိုယ်တိုင်စစ်ဆေးရမှာဖြစ်တယ်လို့ ဆိုပါတယ်။
အဲဒီလူမျိုးသုဉ်းသတ်ဖြတ်မှုဆိုတာ နိုင်ငံတခုအပေါ်စွပ်စွဲနိုင်တဲ့ အပြင်းထန်ဆုံးစွပ်စွဲချက်ဖြစ်တဲ့အတွက် ခိုင်မာမှုမရှိတဲ့ အထောက်အထားတွေအပေါ်မှာ အခြေမခံသင့်ကြောင်း သူကထောက်ပြခဲ့တာပါ။
အဲဒီအပြင် ဂမ်ဘီယာဘက်ကတင်ပြတဲ့ သက်သေထွက်ဆိုချက်လေးဆယ့်သုံးခုမှာ တခုကလွဲလို့ကျန်တာအားလုံးဟာ အမည်အစစ်အမှန်ကို ဖုံးကွယ်ထားတာကြောင့် ဒါဟာလူတစ်ဦးတည်းကပဲ ထွက်ဆိုချက်အမျိုးမျိုး ပေးနေတာလားဆိုတာ ခွဲခြားလို့မရနိုင်ဘူးလို့ ဆိုပါတယ်။
အဲဒီသက်သေတွေဟာ သက်သေကိုယ်တိုင်က လက်မှတ်ထိုးအတည်ပြုထားတဲ့ “ကျမ်းကျိန်လွှာ” မျိုးမဟုတ်ဘဲ “လူတွေ့မေးမြန်းမှုမှတ်တမ်း” တွေသာဖြစ်နေတဲ့အတွက် ဥပဒေကြောင်းအရယုံကြည်စိတ်ချရမှု အားနည်းနေတယ်လို့ တရားရုံးမှာတင်ပြခဲ့ပါတယ်။
ဘင်္ဂလားဒေ့ရှ်ရှိ စခန်းတွေမှာနေထိုင်သူအချို့ဟာ ARSA အဖွဲ့ဝင်တွေ ဒါမှမဟုတ် ထောက်ခံသူတွေ ဖြစ်နိုင်သလို ကျန်တဲ့သူတွေဟာလည်း ARSA အဖွဲ့ရဲ့အကြမ်းဖက်မှုတွေကို ကြောက်ရွံ့နေရတာကြောင့် အဖြစ်မှန်ကိုလွတ်လွတ်လပ်လပ် ထွက်ဆိုနိုင်ခြင်းမရှိတာလို့ ရှေ့နေကထောက်ပြပါတယ်။
အဲဒါကြောင့် ဂမ်ဘီယာကိုကူညီနေတဲ့ Legal Action Worldwide လို အဖွဲ့အစည်းတွေဟာလည်း သူတို့ရဲ့အမှုသည်တွေဆီကရတဲ့ အချက်အလက်တွေကို မြန်မာနိုင်ငံဘက်ကိုမပေးဘဲ ဂမ်ဘီယာဘက်ကိုပဲ ပွင့်လင်းစွာဘက်လိုက်ပေးအပ်နေတာကြောင့် ဒီသက်သေတွေဟာ ယုံကြည်စိတ်ချရမှုမရှိဘူးလို့ ချေပထားပါတယ်။
