Border News Agency
ကျောက်တော်၊ ဇန်နဝါရီ ၂၂။
မြန်မာနိုင်ငံတဝှမ်း စစ်ကော်မရှင်တပ်လေကြောင်းတိုက်ခိုက်လို့ တနှစ်အတွင်းအရပ်သားပြည်သူ နှစ်ထောင့်သုံးရာ့နှစ်ဆယ့်ခြောက်ဦးသေဆုံးခဲ့ရပြီး လေးထောင့်တရာ့လေးဆယ့်ခြောက်ဦး ဒဏ်ရာရသွားတယ်လို့ အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနက ဇန်နဝါရီလ ၂၀ ရက်နေ့မှာထုတ်ပြန်ပါတယ်။
အဲဒီလိုလေကြောင်းတိုက်ခိုက်လို့ အောက်တိုဘာလမှာ နှစ်ရာ့ရှစ်ဆယ့်တဦးနဲ့အများဆုံးဖြစ်ခဲ့ပြီး ဩဂုတ်လမှာ နှစ်ရာ့ခုနှစ်ဆယ့်နှစ်ဦး၊ မေလမှာနှစ်ရာ့ငါးဆယ်ဦးထိ သေဆုံးခဲ့ရတယ်လို့ဆိုပါတယ်။
ဒီသုံးလဟာ အရပ်သားပြည်သူတွေ အသတ်ခံရမှုအများဆုံးလတွေ ဖြစ်ခဲ့တယ်လို့ဆိုပါတယ်။
အဲဒီအပြင်ကျန်တဲ့လတွေမှာလည်း လေကြောင်းရန်ကြောင့် ပြည်သူတွေအသက်ဆုံးရှုံးခဲ့ရတာတွေ ရှိနေဆဲဖြစ်ပြီး ဇန်နဝါရီလမှာ တရာ့ရှစ်ဆယ့်ငါးဦးသေဆုံးပြီး ဖေဖော်ဝါရီမှာ တရာ့ခြောက်ဆယ့်နှစ်ဦး၊ မတ်လမှာ တရာ့ခုနှစ်ဆယ့်ခြောက်ဦးနဲ့ ဧပြီလမှာ တရာ့ငါးဆယ်ဦး၊ ဇွန်လမှာတရာဦးနဲ့ ဇူလိုင်လမှာ တရာ့ခုနှစ်ဆယ့်ကိုးဦး သေဆုံးခဲ့တယ်လို့ ဆိုပါတယ်။
အဲဒီအပြင် စက်တင်ဘာလမှာ တရာ့လေးဆယ့်ခုနှစ်ဦး၊ နိုဝင်ဘာလမှာ တရာ့ရှစ်ဆယ့်ရှစ်ဦးနဲ့ ဒီဇင်ဘာလမှာ နှစ်ရာ့သုံးဆယ့်ခြောက်ဦးထိ သေဆုံးခဲ့ရတယ်လို့ဆိုပါတယ်။
အဲဒီအပြင်ပြည်သူတွေရဲ့ နေအိမ်ပေါင်းသုံးထောင့်ငါးရာခုနှစ်ဆယ့်ခြောက်လုံး ပျက်စီးသွားခဲ့သလို ဘာသာရေးဆိုင်ရာအဆောက်အဦး တရာ့ကိုးဆယ်လုံးလည်း ပြိုပျက်ခဲ့ရတယ်လို့ ဆိုပါတယ်။
နောက်ပြီး ကလေးတွေပညာသင်ကြားနေတဲ့ ကျောင်းဆောင်တရာ့နှစ်လုံးနဲ့ ဆေးကုသပေးနေတဲ့ ကျန်းမာရေးဆိုင်ရာ အဆောက်အဦး သုံးဆယ့်ခြောက်လုံးထိ လေကြောင်းတိုက်ခိုက်လို့ ပျက်စီးခဲ့ရတယ်လို့ ဆိုပါတယ်။
