Border News Agency
ကျောက်တော်၊ ဇန်နဝါရီ ၂၅။
အာရက္ခတပ်တော် (AA) ထိန်းချုပ်နယ်မြေတွေမှာ အာရက္ခပြည်သူ့တော်လှန်ရေးအစိုးရက ခုနှစ်ဆန်းပိုင်းကစပြီး မူးယစ်ဆေးဝါးတိုက်ဖျက်ရေးကို အရှိန်အဟုန်မြှင့်နှိမ်နင်းရေးတွေလုပ်ဆောင်နေပါတယ်။
အဲဒီကျောက်တော်မြို့နယ်က ဘိန်းစာပင်စိုက်ခင်းတွေကို ဇန်နဝါရီလထဲမှာ အကုန်လိုက်ရှင်းနေသလို WY စိတ်ကြွဆေးနဲ့ ဆေးခြောက်ရောင်းတဲ့သူတွေကိုလည်း အရင်ကထက်ပိုပြီး တင်းတင်းကျပ်ကျပ်လိုက်ဖမ်းနေတာပါ။
အဲဒီနှိမ်နင်းရေးကို အာရက္ခပြည်သူ့အစိုးရရဲ့ ဒီလပ် (DLEPS) ဌာန၊ ပါတီတိုက်နယ်ရုံးတွေနဲ့ သက်ဆိုင်ရာရပ်ရွာအုပ်ချုပ်ရေးမှူးတွေ ကိုယ်တိုင်ဦးစီးပြီး မြေပြင်အထိဆင်းလုပ်နေကြတာပါ။
အဲဒီမူးယစ်ဆေးတင်မကဘဲ အရင်ကတည်းက ပိတ်ပင်ထားတဲ့နိုင်ငံခြားဖြစ် အရက်၊ ဘီယာတွေကိုပါ ရောင်းခွင့်၊ သောက်ခွင့်မရှိအောင်အဖွဲ့စုံနဲ့ လိုက်လံစစ်ဆေးအရေးယူနေတာဖြစ်ပါတယ်။
AA ဘက်က ခုလိုထိထိရောက်ရောက် လုပ်လာတာဟာ ဒေသတွင်းကလူငယ်တွေ မူးယစ်ဆေးကြောင့် လမ်းမမှားစေဖို့နဲ့ လူမှုရေးပြဿနာတွေ မရှိအောင်ကြိုတင်ကာကွယ်တဲ့ သဘောပဲဖြစ်တယ်လို့ ပြည်သူတွေကဆိုကြပါတယ်။
