Border News Agency
ဘိုလီးဗီးယား၊ ဖေဖော်ဝါရီ ၂၈။
ဘိုလီးဗီးယားနိုင်ငံမြို့တော်အနီးမှာ ဖေဖော်ဝါရီလ ၂၇ ရက်နေ့က ငွေစက္ကူအသစ်တွေတင်ဆောင်လာတဲ့ စစ်ဘက်ကုန်တင်လေယာဉ်တစီးပျက်ကျခဲ့လို့ အနည်းဆုံး လူ ၁၅ ဦး သေဆုံးပြီး လမ်းပေါ်ကမော်တော်ယာဉ်အစီး ၂၀ နီးပါး ပျက်စီးသွားခဲ့တယ်လို့ နိုင်ငံတကာသတင်းတွေအရသိရပါတယ်။
အဲဒီ Hercules C – 130 လေယာဉ်ဟာ ဗဟိုဘဏ်အတွက်ရိုက်နှိပ်ထားတဲ့ ငွေစက္ကူအသစ်တွေကို သယ်ဆောင်လာတာဖြစ်ပြီး အယ်လ်အော်လ်တိုလေဆိပ်ကိုဆင်းသက်စဉ် ပြေးလမ်းချော်ကာ အနီးနားကလမ်းမကြီးပေါ်သို့ ထိုးကျသွားခဲ့တာလို့ ကာကွယ်ရေးဝန်ကြီးဌာနက ဆိုပါတယ်။
လေယာဉ်ပျက်ကျမှုကြောင့် လေယာဉ်ပေါ်ပါသူတွေအပြင် လမ်းပေါ်မှာရှိနေတဲ့ ကားတွေကိုပါထိမှန်ခဲ့လို့ အနည်းဆုံး လူ ၁၅ ဦး သေဆုံးခဲ့ရပြီး လေယာဉ်အမှုထမ်း ၆ ဦးထဲက ၂ ဦးကိုတော့ လက်ရှိအချိန်ထိ ရှာမတွေ့သေးဘူးလို့ မီးသတ်တပ်ဖွဲ့က အတည်ပြုထားပါတယ်။
လေယာဉ်ပျက်ကျတဲ့နေရာမှာ ပြန့်ကျဲနေတဲ့ငွေစက္ကူတွေကို ရာနဲ့ချီတဲ့ဒေသခံတွေက လုယက်သိမ်းဆည်းဖို့ ကြိုးစားခဲ့ကြလို့ ကယ်ဆယ်ရေးလုပ်ငန်းတွေကြန့်ကြာခဲ့ရပြီး စစ်သား ၅၀၀ ကျော်နဲ့ ရဲတပ်ဖွဲ့ဝင် ၁၀၀ ကျော်က အင်အားသုံး လူစုခွဲခဲ့ရပါတယ်။
ဗဟိုဘဏ်ဥက္ကဋ္ဌကတော့ အဲဒီငွေစက္ကူတွေဟာ လည်ပတ်မှုထဲမရောက်သေးလို့ တရားဝင်တန်ဖိုးမရှိဘူးလို့ ပြောကြားခဲ့ပြီး ရဲတပ်ဖွဲ့က ပြန့်ကျဲနေတဲ့ငွေသေတ္တာတွေကို အခင်းဖြစ်နေရာမှာပဲ မီးရှို့ဖျက်ဆီးခဲ့တယ်လို့ AP သတင်းဌာန က ဖော်ပြထားပါတယ်။
