Border News Agency
ရန်ကုန်၊ မတ် ၂။
စစ်ကော်မရှင်တပ်က လွတ်ငြိမ်းခွင့်ပေးပြီးပြန်လည်လွတ်မြောက်လာသူတွေထဲမှာ ထောင်ဒဏ်တသက်တကျွန်း ချမှတ်ခံထားရတဲ့ မှတ်တမ်းရုပ်ရှင်ဖန်တီးသူ ရှင်ဒေဝီ၊မမူးရတနာနဲ့ ကျောင်းသားခေါင်းဆောင်တချို့ပါဝင်လာတယ်လို့ သိရပါတယ်။
မတ်လ ၂ ရက်၊ ဒီနေ့မှာကျရောက်တဲ့ တောင်သူလယ်သမားနေ့မှာ စစ်ကော်မရှင်တပ်က လွတ်ငြိမ်းခွင့်ပေးတဲ့အထဲ ပြန်လည်လွတ်မြောက်လာကြတာဖြစ်ပါတယ်။
အဲဒီမှတ်တမ်းရုပ်ရှင်ဖန်တီးသူ ရှင်ဒေဝီကို ၂၀၂၃ ခုနှစ်က ဒရုန်းလက်ဝယ်တွေ့ရှိမှုနဲ့ စစ်ကော်မရှင်တပ်ကဖမ်းဆီးခဲ့တာဖြစ်ပြီး စစ်ခုံရုံးကနေအမြင့်ဆုံးပြစ်ဒဏ်တွေ ချမှတ်ခဲ့တာဖြစ်ပါတယ်။
အဲဒီအပြင် ၂၀၂၁ ခုနှစ်၊ ကြည့်မြင့်တိုင်သပိတ်မှာ ကားနဲ့တိုက်ဖမ်းဆီးခံရလို့ ခြေထောက်နှစ်ဖက်လုံး ဒဏ်ရာပြင်းထန်ရရှိခဲ့တဲ့ သတင်းထောက်မမှူးရတနာခက်မို့မို့ထွန်းလည်း ဒီနေ့မှာပဲပြန်လည်လွတ်မြောက်လာခဲ့ပါတယ်။
သူမဟာ ထောင်တွင်းမှာလနဲ့ချီပြီး ဆေးကုသမှုခံယူခဲ့ရသလို ဝှီးချဲနဲ့ ချိုင်းထောက်တွေသုံးပြီး ခက်ခက်ခဲခဲဖြတ်သန်းခဲ့ရသူလည်းဖြစ်ပါတယ်။
ကျောင်းသားသမဂ္ဂခေါင်းဆောင်တွေဖြစ်တဲ့ ကိုထက်ပိုင်စိုး၊မနွေးရတီတိုးနဲ့ ထောင်ဒဏ် ၁၅ နှစ်အထိချမှတ်ခံထားရတဲ့ အရှေ့ပိုင်းတက္ကသိုလ်ကျောင်းသားများသမဂ္ဂဥက္ကဋ္ဌ မဆုရည်လင်းတို့လည်း ဒီနေ့မှာပဲအတူတကွ လွတ်မြောက်လာကြပါတယ်။
ကိုထက်ပိုင်စိုးဟာ ၂၀၂၃ ခုနှစ်က ရန်ကုန်မှာဖမ်းဆီးခံခဲ့ရပြီး ထောင်ဒဏ် ၁၀ နှစ်ချမှတ်ခံထားရသူဖြစ်ပါတယ်။
အခုလို ထောင်ဒဏ်နှစ်ရှည်နဲ့ တသက်တကျွန်းချမှတ်ခံထားရတဲ့ တော်လှန်ရေးအင်အားစုတွေ ပြန်လည်လွတ်မြောက်လာတာဟာ မိသားစုဝင်တွေအတွက်တင်မကဘဲ အားလုံးအတွက်ပါဝမ်းမြောက်စရာသတင်းတခုဖြစ်လာခဲ့ပါတယ်။
