Border News Agency
ပဲခူး၊ဇွန် ၁၀။
ပဲခူးတိုင်း၊ရေတွင်းကုန်းကျေးရွာမှာ ဖြစ်ပွားခဲ့တဲ့ အရပ်သားပြည်သူ အစုလိုက်အပြုံလိုက် သတ်ဖြတ်ခံရမှုဟာ စစ်ရာဇဝတ်မှုမြောက်ပြီး နိုင်ငံတကာကနေ အရေးယူဖို့ အထူးလိုအပ်နေတယ်လို့ Fortify Rights အဖွဲ့က ဇွန်လ ၉ ရက်၊မနေ့ကထုတ်ပြန်လိုက်ပါတယ်။
ပြီးခဲ့တဲ့ မတ်လ ၅ ရက်နေ့က အရပ်သားတွေခိုလှုံနေတဲ့ဘုန်းကြီးကျောင်းကိုစစ်တပ်က လေကြောင်းတိုက်ခိုက်ခဲ့တာကြောင့် အမျိုးသမီးနဲ့ ကလေးငယ်တွေအပါအဝင် အရပ်သား ၂၈ ဦး သေဆုံးခဲ့ရပါတယ်။
အဲဒီတိုက်ခိုက်မှုကို အမှတ် ၇၇ခြေမြန်တပ်မဌာနချုပ် လက်အောက်ခံ တပ်ရင်းတွေက ကျူးလွန်ခဲ့တာဖြစ်ပြီး အာဏာသိမ်းစစ်တပ်ရဲ့ မဟာဗျူဟာမြောက် အရပ်သားတွေကို အကြောက်တရားလွှမ်းမိုးအောင် လုပ်ဆောင်တဲ့ လုပ်ရပ်တခုဖြစ်တယ်လို့ Fortify Rights က ထောက်ပြပါတယ်။
အသက်ရှင်လွတ်မြောက်လာသူတဦးရဲ့ ထွက်ဆိုချက်အရ စစ်သားတွေဟာ ရွာသားတွေကို ဖမ်းဆီးပြီး PDF တွေလားလို့ မေးမြန်းခြိမ်းခြောက်ခဲ့သလို အဖြူရောင်အမှုန့်တမျိုးကို ရှုသွင်းကာ မူးယစ်ရီဝေနေတဲ့ပုံစံမျိုးနဲ့ ဘုန်းကြီးကျောင်းကို ဗုံးကြဲဖို့ အမိန့်ပေးခဲ့တာကို ကိုယ်တိုင်ကြားခဲ့ရတယ်လို့ ဆိုပါတယ်။
အဲဒီတိုက်ခိုက်မှုအပြီးမှာတော့ သူဟာ မိမိရဲ့ ဇနီးနဲ့ သားဖြစ်သူရဲ့ ရုပ်အလောင်းတွေကိုသာ ပြန်လည်တွေ့ခဲ့တယ်လို့ဆိုပါတယ်။
Fortify Rights ရဲ့ ဒါရိုက်တာ John Quinley က စစ်ဥပဒေတွေအရ အရပ်သားတွေကို ရည်ရွယ်ချက်ရှိရှိ သတ်ဖြတ်တာဟာ စစ်ရာဇဝတ်မှုမြောက်ပြီး ဒါဟာအာကာသိမ်းစစ်တပ်ရဲ့ ပြစ်ဒဏ်ကင်းလွတ်ခွင့်ရနေမှုကို အဆုံးသတ်ဖို့ ချက်ချင်းလိုအပ်နေတယ်လို့လည်းဆိုပါတယ်။
အဲဒါကြောင့် အာဆီယံနဲ့ ကုလသမဂ္ဂအဖွဲ့ဝင်နိုင်ငံတွေအနေနဲ့ အခုထက်ပိုပြီး ထိရောက်တဲ့ လုပ်ဆောင်ချက်တွေ လုပ်ဖို့လိုတယ်လို့ဆိုပါတယ်။
အဲဒီဖြစ်စဉ်နဲ့ပတ်သက်ပြီး အာဏာသိမ်းစစ်တပ်ရဲ့ အာဏာတည်မြဲရေး ကြိုးပမ်းချက်တွေကို နိုင်ငံတကာက ပြတ်ပြတ်သားသား ပယ်ချပေးဖို့နဲ့ အမျိုးသားညီညွတ်ရေးအစိုးရ (NUG) အပါအဝင် ဒီမိုကရေစီလှုပ်ရှားမှုတွေကို ပိုမိုထိရောက်စွာ ထောက်ပံ့ကူညီပေးဖို့လည်း Fortify Rights က တိုက်တွန်းထားပါတယ်။
