Border News Agency
ကွတ်ခိုင်၊ မတ် ၉။
တအာင်းပြည်၊ ကွတ်ခိုင်ခရိုင်၊ နမ့်ဖတ်ကာမြို့ပေါ်မှာ နေအိမ်တလုံးမီးလောင်မှုဖြစ်ပွားလို့ အမျိုးသမီး နှစ်ဦးမီးလောင်သေဆုံးသွားခဲ့တယ်လို့ တအာင်းတပ်မတော်က မတ်လ ၉ရက်၊ဒီနေ့ထုတ်ပြန်ပါတယ်။
အဲဒီနမ့်ဖတ်ကာမြို့၊ရပ်ကွက် ၆ မှာနေထိုင်တဲ့ အသက်ခြောက်ဆယ်အရွယ် ဒေါ်အမ်ခေါင်နဲ့ မြေးဖြစ်သူအသက်ဆယ်နှစ်အရွယ် မအေမိုးကီ မီးလောင်ဒဏ်ရာနဲ့အသက်ဆုံးရှုံးသွားခဲ့တယ်လို့ ဆိုပါတယ်။
အဲဒီ ဒေါ်အမ်ခေါင်ဟာ မတ်လ ၈ ရက်၊ ည ၉နာရီအချိန်ခန့်က နေအိမ်ကနေရံပေါ်မှာ ဖယောင်းတိုင်မီးထွန်းထားခဲ့တာကြောင့် မီးဟာအောက်မှာထားတဲ့ ဓာတ်ဆီပုံးပေါ်ကိုကျသွားပြီး မီးလောင်မှုဖြစ်ပွားခဲ့တာလို့ ဆိုပါတယ်။
မီးလောင်သွားတဲ့နေအိမ်ဟာ နှစ်ထပ်တိုက်အိမ်ဖြစ်တာကြောင့် နေအိမ်နဲ့အိမ်အတွင်းရှိပစ္စည်းတွေအားလုံး မီးလောင်ပျက်စီးသွားခဲ့ပြီး မီးလောင်မှုဖြစ်ပွားခဲ့တဲ့နေရာကို PSLF/TNLA မီးသတ်တပ်ဖွဲ့နဲ့ ပြည်သူလူထုတွေမှ ပူးပေါင်းဝိုင်းဝန်းပြီးမီးကိုငြိမ်းသတ်နိုင်ခဲ့တယ်လို့ ဆိုပါတယ်။
ပြည်သူလူထုတွေအနေနဲ့ မီးဘေးအန္တရာယ်မှကင်းဝေးစေဖို့ ပြည်သူတဦးချင်းစီမှ အသိရှိရှိ၊ သတိရှိရှိနဲ့ ပူးပေါင်းဆောင်ရွက်ကြဖို့လိုအပ်သလို မီးလောင်မှုဖြစ်ပွားပါက နီးစပ်ရာမီးသတ်တပ်ဖွဲ့တွေဆီ အမြန်ဆုံးအကြောင်းကြားပြီး ပူးပေါင်းကူညီကြဖို့လိုအပ်တယ်လို့ ဆိုပါတယ်။
နွေရာသီဖြစ်တာကြောင့် ပြည်သူတွေအနေနဲ့ မီးဘေးအန္တရာယ်ကြိုတင်ကာကွယ်ရေးအတွက် အထူးသတိပြုဖို့လိုအပ်သလို နေအိမ်ပတ်ဝန်းကျင်မှာ ရေနံဆီ၊ ဓာတ်ဆီ၊ စက္ကူ၊ အဝတ်အစား၊ သစ်၊ ဝါး၊ ဓနိ၊ သက်ကယ် စတဲ့မီးလောင်လွယ်တဲ့ ပစ္စည်းတွေကို စနစ်တကျထားရှိရမယ်လို့ ဆိုပါတယ်။
နောက်ပြီး မီးအသုံးပြုပြီးပါက သေချာမီးငြိမ်းသတ်ဖို့၊ ဘက်ထရီအိုး၊ဆိုလာပြား စစ်ဆေးတာ၊လျှပ်စစ်မီးအသုံးပြုရာမှာမီးခလုတ်တွေကို စစ်ဆေးပိတ်ထားဖို့နဲ့ ပေါ့ဆမီးမဖြစ်ပွားဖို့ အထူးသတိပြုရမယ်လို့ အသိပေးထားပါတယ်။
