Border News Agency
အမေရိကန်၊ဇွန် ၂၈။
ဟော်မုဇ်ရေလက်ကြားအနီးကုန်သွယ်ရေးသင်္ဘောတစီး ဒရုန်းနဲ့ တိုက်ခိုက်ခံရပြီးနောက် အမေရိကန်က အီရန်တောင်ပိုင်းကို ဇွန်လ ၂၇ ရက်နေ့ကနေ ဒီနေ့မနက်ပိုင်းအထိ ဒုတိယမြောက်နေ့အဖြစ် ဆက်တိုက်ဗုံးကြဲခဲ့ပါတယ်။
အီရန်ဘက်ကလည်း ဘာရိန်းနဲ့ ကူဝိတ်မှာရှိတဲ့ အမေရိကန်စခန်းတွေကို ဒုံးကျည်တွေ၊ ဒရုန်းတွေနဲ့ ချက်ချင်းပြန်လည်တိုက်ခိုက်ခဲ့တယ်လို့ အယ်လ်ဂျာဇီးယား (Al Jazeera)သတင်းအရ သိရပါတယ်။
အမေရိကန်စစ်တပ်ဟာ အီရန်နိုင်ငံရဲ့ စီရစ်ခ်၊ ဘန်ဒါအာလင်ဂါနဲ့ ကွတ်ရှမ်ကျွန်းအပါအဝင် စစ်စခန်း ၁၀ ခုထက်မနည်းကို လေကြောင်းကနေ ဗုံးကြဲခဲ့တာဖြစ်ပြီး အီရန်ဘက်ကလည်း ဒါဟာ နှစ်ဖက်ကြားချုပ်ဆိုထားတဲ့ နားလည်မှုစာချွန်လွှာ (MoU) ကို ချိုးဖောက်တာဖြစ်တယ်လို့ ပြင်းပြင်းထန်ထန် ရှုတ်ချလိုက်ပါတယ်။
အမေရိကန်ရဲ့ ဗုံးကြဲမှုကြောင့် အီရန်တော်လှန်ရေးအစောင့်တပ်ဖွဲ့ (IRGC) က ဘာရိန်းနဲ့ ကူဝိတ်ရှိ အမေရိကန်စစ်စခန်းတွေကို ဒီနေ့မနက်ပိုင်းမှာ ပြန်လည်ပစ်ခတ်ခဲ့လို့ ဘာရိန်းမှာ လေကြောင်းရန်သတိပေးဥဩသံတွေ မြည်ဟီးခဲ့သလို ကူဝိတ်လေကြောင်းရန်ကာကွယ်ရေးစနစ်ကလည်း ကြားဖြတ်ခုခံခဲ့ရပါတယ်။
အဲဒီအတောအတွင်း အမေရိကန်ဒီမိုကရက်တစ် အမတ်တဦးဖြစ်သူ ရိုခန်နာကလည်း သမ္မတထရမ့်အနေနဲ့ ဒီစစ်ပွဲကို ချက်ချင်းရပ်တန့်ဖို့ တောင်းဆိုလိုက်ပြီး အခုလို တိုက်ခိုက်တာဟာ ကွန်ဂရက်က အတည်ပြုထားတဲ့ စစ်ပွဲဆိုင်ရာလုပ်ပိုင်ခွင့် ဆုံးဖြတ်ချက်ကို ဗြောင်ကျကျချိုးဖောက်ရာရောက်တယ်လို့ ဝေဖန်ထားပါတယ်။
အီရန်ဘက်ကတော့ ဟော်မုဇ်ရေလက်ကြား ဖြတ်သန်းသွားလာခွင့်ကို သူတို့မှာ လုပ်ပိုင်ခွင့်အပြည့်ရှိပြီး အမေရိကန်ဘက်က ထပ်မံတိုက်ခိုက်လာရင် ပြင်းထန်တဲ့ တုံ့ပြန်မှုတွေနဲ့အတူ ငြိမ်းချမ်းရေးလုပ်ငန်းစဉ်တခုလုံးကို အပြီးတိုင် ရပ်တန့်ပစ်မယ်လို့ သတိပေးထားတာကြောင့် ဒေသတွင်း စစ်ရေးတင်းမာမှုတွေ ပိုမိုမြင့်တက်လာနေပါတယ်။
