Border News Agency
နီပေါ၊ မတ် ၁၀။
ဂျင်ဇီတွေလမ်းမပေါ်ထွက်ပြီး ဖြုတ်ချခဲ့တဲ့ နီပေါဝန်ကြီးချုပ်ဟောင်းကေပီရှာမာအိုလီ(K. P. Sharma Oli)ဟာ ၂၀၂၆ ခုနှစ်၊မတ်လ ၅ ရက်နေ့ကျင်းပတဲ့ လူထုလွတ်တော်ပရာတီနီဒီဆာဘာ( Pratinidhi Sabh)ရွေးကောက်ပွဲမှာ ရှုံးသွားတယ်လို့ နီပေါသတင်းဌာနတွေဆိုပါတယ်။
အဲဒီရွေးကောက်ပွဲမဲရလဒ်တွေကို မတ် လ ၆ ရက်နေ့နဲ့ မတ်လ ၇ ရက်နေ့မှာ မဲရရေတွက်နေတာပါ။
ဝန်ကြီးချုပ်ဟောင်းဟာ မက် – လီနင်ဝါ ဒီနီပေါကွန်မြူနစ်ပါတီရဲ့ ဥက္ကဋ္ဌလည်းဖြစ်ပါတယ်။
ဂျာပါ(Jhapa)အမှတ် ၅ မဲဆန္ဒနယ်မြေမှာ သူဟာဝင်ပြိုင်တဲ့အခါ ပြိုင်ဖက်ရာစထရိယဆွာတန်တရပါတီ( Rastriya Swatantra Party)က ဘာလင်ရှား(Balen Shah)ကို ရှုံးသွားတယ်လို့ဆိုပါတယ်။
ဘာလင်ရှားဟာ ၆၈၃၄၈ မဲရပြီး ဝန်ညကြီးချုပ်ဟောင်း အိုလီက ၁၈၇၃၄ ရခဲ့တာပါ။ ဘာလင်ရှားဟာ အိုလီထက် ၄၉ ၆၁၄ မဲ အသာရခဲ့ပြီး ဒါဟာနီပေါနိုင်ငံရေးသမိုင်းမှာ သိသာထင်ရှားတဲ့မဲရလဒ်ကွာခြားမှုဖြစ်တယ်လို့ ဆိုပါတယ်။
ဝန်ကြီးချုပ်ဟောင်းအိုလီကို အနိုင်ရခဲ့တဲ့ဘာလင်ရှားဟာ ခေတ္တမန္ဒူရဲ့ မြို့တော်ဝန်ဟောင်းလည်းဖြစ်ပါတယ်။
သူကို အနာဂတ်မှာဝန်ကြီးချုပ်လောင်းအဖြစ်လျာထားတယ်လို့ဆိုပါတယ်။
ဘာလင်ရှားဟာ လူငယ်တွေကြားမှာလည်းရေပန်းစားသူဖြစ်ပြီး သူရဲ့တိုးတက်တဲ့ခေါင်းဆောင်မှုနဲ့ ကတိကဝတ်တွေလည်း လူကြိုက်များပါတယ်။
အဲဒီရလဒ်ကကွန်မြူနစ်ပါတီအားကောင်းတဲ့ကိုရှီနယ်မြေ(Koshi Province)ထဲမှာ အပြောင်းအလဲဖြစ်သွားစေခဲ့ပါတယ်။
နီပေါရဲ့လူထုလွတ်တော်မှာ အမတ်ပေါ င်း ၂၇၅ ယောက်ရှိပါတယ်။
အဲဒီထဲက အမတ် ၁၆၅ ယောက်ကို မဲများသူအကုန်ယူစနစ်(FPTP)စနစ်နဲ့ ရွေးကောက်ပါတယ်။ကျန် ၁၁၀ ဦးကိုတော့ ပါတီကိုအချိုးကျကိုယ်စားပြုစနစ်နဲ့ ရွေးချယ်ရပါတယ်။
လက်ရှိ ရွေးကောက်ပွဲမှာတော့ မဲပေးဖို့ လူပေါင်း ၁၈.၉ သန်း မှတ်ပုံတင်ကြတယ်လို့ ဆိုပါတယ်။
အဲဒီမှာပါဝင်ယှဥ်ပြိုင်တဲ့ကိုယ်စားလှယ်လောင်းပေါင်း ၃၄၀၀ ကျော်ရှိပြီး ၆၈ ပါတီဝင်ပြိုင်ကြတယ်လို့ ဆိုပါတယ်။
နီပေါဟာ ဖက်ဒရယ်စနစ်ကို ကျင့်သုံးပြီးလွှတ်တော်နှစ်ရပ်ရှိပါတယ်။ လူထုလွတ်တော် ပရာတီနီဒီဆာဘာကဝန် ကြီးချုပ်ကို တင်မြောက်မှာပါ။
အထက်လွှတ်တော်ရာစထရိယဆာဘာ (Rriya Sabh)မှာတော့ အမတ် ၅၉ ယောက်ရှိပြီး ပြည်နယ် ၇ ခုက ပြည်နယ်အမတ် ၈ ဦးစီရွေးချယ်ပေးရပါတယ်။ ကျန် ၃ ဦးကိုတော့ အစိုးရအဖွဲ့ရဲ့သဘောထားမှတ်ချက်အရ သမ္မတကရွေးချယ်ပေးပါတယ်။
မကြာခင်မှာတော့ နီပေါရွေးကောက်ပွဲ ရလဒ်တွေကပိုမိုပီပြင်လာဖို့ရှိနေပြီး အေးအေးဆေးဆေး ပြီးဆုံးသွားမှာလားဆိုတာကတော့ စောင့်ကြည့်ရမှာပါ။
