Border News Agency
အီရန်၊ မတ် ၁၂။
စစ်ပွဲစတင်တဲ့ပထမဆုံးနေ့မှာပဲ အမေရိကန်ရဲ့ တိုမာဟော”ဒုံးကျည် မှားယွင်းထိမှန်ခဲ့တဲ့အီရန်မူလတန်းကျောင်းဖြစ်စဉ်မှာ သေဆုံးသူအရေအတွက်ဟာ ၁၇၅ ဦးအထိ ရှိလာပြီလို့ နယူးယောက်တိုင်းမ် (New York Times) သတင်းဌာနက ဖော်ပြပါတယ်။
အစပိုင်းမှာ သမ္မတထရမ့်ကအီရန်ရဲ့လက်ချက်လို့ ငြင်းဆိုခဲ့ပေမယ့် အမေရိကန်စစ်ဘက်ရဲ့ပဏာမစုံစမ်းစစ်ဆေးမှုတွေအရတော့ ဒါဟာအမေရိကန်ရဲ့ အမှားဖြစ်တယ်ဆိုတာ ပေါ်ပေါက်လာတာပါ။
ဒီတိုက်ခိုက်မှုအတွင်း သေဆုံးသွားရသူတွေထဲမှာ အများစုကကျောင်းနေအရွယ် ကလေးငယ်တွေဖြစ်နေတာကြောင့် လူသားချင်းစာနာမှုဆိုင်ရာ အဖွဲ့အစည်းတွေကြားမှာအရမ်းကို စိတ်မကောင်းစရာ ဖြစ်နေရပါတယ်။
အမေရိကန် အလယ်ပိုင်းစစ်ဌာနချုပ်က ပစ်မှတ်သတ်မှတ်တဲ့နေရာမှာ ကာကွယ်ရေးထောက်လှမ်းရေးအေဂျင်စီကပေးတဲ့ အချက်အလက်အဟောင်းတွေကို သုံးမိခဲ့တာကြောင့် အခုလို အမှားအယွင်း ဖြစ်ခဲ့ရတာလို့ ဆိုပါတယ်။
မီနပ်မြို့မှာရှိတဲ့ အဲဒီကျောင်းဟာ အီရန်တော်လှန်ရေးအစောင့်တပ် ရေတပ်စခန်းနဲ့ တစ်ဝင်းတည်းမှာ ရှိနေတာဖြစ်ပြီး အရင်ကတော့ အဲဒီအဆောက်အအုံဟာ တပ်ရင်းရဲ့ အစိတ်အပိုင်းတစ်ခု ဖြစ်ခဲ့ဖူးပါတယ်။
ဒါပေမယ့် ၂၀၁၃ နဲ့ ၂၀၁၆ ကြားမှာ အဲဒီနေရာကို ခြံစည်းရိုးခတ်ပြီး ကျောင်းအဖြစ် ပြောင်းလဲဖွင့်လှစ်ခဲ့တာကို အမေရိကန်စစ်ဘက်က ဒေတာအဟောင်းတွေကြောင့် သတိမထားမိဘဲ ဗုံးကြဲမိခဲ့တာပါ။
အခုလို အမှားအယွင်းကြောင့် အပြစ်မဲ့ကလေးငယ်တွေ အစုလိုက်အပြုံလိုက် သေဆုံးခဲ့ရတဲ့အပေါ် အီရန်အစိုးရနဲ့ နိုင်ငံတကာအသိုင်းအဝိုင်းက ပြင်းပြင်းထန်ထန် ဝေဖန်ကန့်ကွက်နေကြပါတယ်။
သမ္မတ ထရမ့်ကတော့ အပြစ်တင်မှုကို ရှောင်လွှဲဖို့ ကြိုးစားနေပေမယ့် တိုမာဟောဒုံးကျည်ကို အမေရိကန်ကပဲ သုံးစွဲတာဖြစ်လို့ စုံစမ်းစစ်ဆေးရေးအရာရှိတွေကြားမှာလည်း အခက်တွေ့နေရတယ်လို့ သိရပါတယ်။
လက်ရှိမှာတော့ ဒီဖြစ်စဉ်နဲ့ပတ်သက်ပြီး အိမ်ဖြူတော်ကတော့ စုံစမ်းစစ်ဆေးမှုတွေလုပ်နေတုန်းပဲလို့ ဆိုထားသလို ဘယ်သူ့ရဲ့ပေါ့လျော့မှုကြောင့် အချက်အလက်အဟောင်းတွေကို မစစ်ဆေးဘဲသုံးခဲ့သလဲဆိုတာကို ဆက်ပြီး စုံစမ်းနေပါတယ်။
သေဆုံးသူ အရေအတွက်ဟာလည်း အပျက်အစီးတွေကြားထဲကနေ ထပ်တိုးလာနိုင်တဲ့အခြေအနေမှာ ရှိနေတယ်လို့ သိရပါတယ်။
