Border News Agency
မြောက်ဦး၊ မတ် ၁၄
အာရက္ခဒေသမှာဖြစ်ပွားနေတဲ့ လက်နက်ကိုင်ပဋိပက္ခတွေကြောင့် ၂၀၂၄ ခုနှစ်၊ ဖေဖော်ဝါရီလကနေ ၂၀၂၆ ခုနှစ်၊ဇန်နဝါရီလအထိ နှစ်နှစ်တာကာလအတွင်း အရပ်သား ၁,၂၇၇ ဦး သေဆုံးခဲ့တယ်လို့ Data for Myanmar အဖွဲ့ရဲ့အစီရင်ခံစာအရ သိရပါတယ်။
အဲဒီကာလအတွင်း အရပ်သား ၁,၉၅၉ ဦး ဒဏ်ရာရရှိခဲ့ပြီး စုစုပေါင်းထိခိုက်သေဆုံးသူ အရေအတွက်ဟာ ၃,၂၃၆ ဦးအထိ ရှိခဲ့တယ်လို့ အစီရင်ခံစာမှာ ဖော်ပြထားပါတယ်။
အဲဒီသေဆုံးသူတွေထဲမှာ လက်နက်ကိုင်အဖွဲ့အစည်းတွေရဲ့ ပစ်မှတ်ထားသတ်ဖြတ်မှုကြောင့် သေဆုံးရသူ ၄၂၃ ဦးရှိပြီး အဲဒီထဲမှာ ၃၉ ရာခိုင်နှုန်းဟာ အမျိုးသမီးတွေ ဖြစ်တယ်လို့ ဆိုပါတယ်။
အဲဒီအပြင် လက်နက်ကြီး၊လေကြောင်းတိုက်ခိုက်တာတွေကြောင့် သေဆုံးရသူ ၅၂၃ ဦးရှိပြီး အဲဒီအထဲမှာ ၅၇ ရာခိုင်နှုန်းဟာ အမျိုးသမီးနဲ့ကလေးငယ်တွေ ဖြစ်တယ်လို့ ဆိုပါတယ်။
အဲဒီအထဲ မြောက်ဦးမြို့နယ်မှာအရပ်သားသေဆုံးမှု အများဆုံးဖြစ်ခဲ့ပြီး အာရက္ခဒေသတခုလုံးသေဆုံးမှုရဲ့ ၂၆ ရာခိုင်နှုန်း ၃၃၅ ဦး ရှိခဲ့တယ်လို့ ဆိုပါတယ်။
အဲဒီအရပ်သားတွေကို ပစ်မှတ်ထားတိုက်ခိုက်မှုတွေကိုရပ်တန့်ဖို့နဲ့ထိခိုက်ခံစားနေရတဲ့ ပြည်သူတွေအတွက်လူသားချင်းစာနာမှုအကူအညီတွေပေးကြဖို့ တိုက်တွန်းထားပါတယ်။
