Border News Agency
မြောက်ဦး၊ ဇွန် ၁၄။
အာရက္ခတပ်တော်(AA)ထိန်းချုပ်ထားတဲ့ မြောက်ဦးခရိုင်မှာ ဇွန်လ ၁၃ ရက်နေ့က ရက္ခိုင်အမျိုးသားအဖွဲ့ချုပ် (ULA) ရဲ့ ဌာနဆိုင်ရာ ဝန်ထမ်း ၃၀၀ ခန့်က ပတ်ဝန်းကျင် စိမ်းလန်းစိုပြည်ဖို့အတွက် သစ်ပင်တွေကို စုပေါင်းစိုက်ပျိုးခဲ့ကြပါတယ်။
လမ်းဘေးတလျှောက်မှာ ပိတောက်၊ ပျဉ်းကတိုးနဲ့ အရိပ်ရပင် စုစုပေါင်း ၃၀၀ ခန့်ကို စိုက်ပျိုးခဲ့တာဖြစ်ပြီး အပင်တွေရှင်သန်စေဖို့ တပင်ချင်းစီကို ခြံစည်းရိုးတွေနဲ့ စနစ်တကျကာရံပေးထားပါတယ်။
ULA ဘက်ကလည်း စိုက်ပျိုးရုံတင်မကဘဲ အပင်တပင်ချင်းစီကို သေချာထိန်းသိမ်းစောင့်ရှောက်ဖို့ ဝန်ထမ်းတွေကို ညွှန်ကြားထားသလို ဒီအစီအစဉ်ကိုလည်း စနေနေ့တိုင်း ပုံမှန်လုပ်ဆောင်သွားမယ်လို့ သိရပါတယ်။
ဒေသတွင်း စိမ်းလန်းရေးအတွက် ULA ဝန်ထမ်းတွေတင်မကဘဲ ရပ်ရွာအလိုက်တအိမ်တပင် စိုက်ပျိုးဖို့ပါရည်ရွယ်ထားတာကြောင့် အခုလိုသစ်ပင်စိုက်ပျိုးမှုဟာ ရာသီဥတုပြောင်းလဲမှုကို လျော့ချဖို့နဲ့ဂေဟစနစ်ကို ထိန်းသိမ်းဖို့အတွက် အဓိကအထောက်အကူဖြစ်စေမှာပါ။
