Border News Agency
အမေရိကန်၊ မတ် ၂၄။
အမေရိကန်သမ္မတ ဒေါ်နယ်ထရမ့်ဟာ အီရန်နိုင်ငံရဲ့လျှပ်စစ်ဓာတ်အားပေးစက်ရုံတွေနဲ့ စွမ်းအင်ကဏ္ဍ အခြေခံအဆောက်အအုံတွေကို တိုက်ခိုက်ဖို့ ပြင်ဆင်ထားတဲ့ စစ်ရေးစီမံချက်အားလုံးကို ၅ ရက်ကြာ ရွှေ့ဆိုင်းဖို့ ပင်တဂွန်စစ်ဌာနချုပ်ကို မတ်လ ၂၃ ရက်နေ့ကညွှန်ကြားလိုက်ပါတယ်။
ပြီးခဲ့တဲ့ ၂ ရက်အတွင်း အီရန်နဲ့ အမေရိကန်ကြားထိရောက်တဲ့ ဆွေးနွေးမှုတွေ ရှိခဲ့တာကြောင့် အခုလိုရက်ရွှေ့လိုက်တာလို့ ထရမ့်က သူရဲ့ Truth Social ကနေတဆင့် အသိပေးခဲ့တာပါ။
ဒါပေမယ့် အီရန်တော်လှန်ရေးအစောင့်တပ် (IRGC)နဲ့ နီးစပ်တဲ့ သတင်းဌာနတွေကတော့ အမေရိကန်နဲ့ ဘာဆွေးနွေးမှုမှ မရှိသေးဘူးလို့တုံ့ပြန်ငြင်းဆိုထားပြီး ထရမ့်ဘက်က လေသံပြောင်းလာတာဟာ အာရပ်မဟာမိတ်နိုင်ငံတွေရဲ့ ဖိအားကြောင့်သာ ဖြစ်တယ်လို့ ဆိုပါတယ်။
အာရပ်နိုင်ငံတွေကတော့ တကယ်လို့ အမေရိကန်က အီရန်ကိုတိုက်ခိုက်ခဲ့ရင် အီရန်ဘက်ကလည်း ဒေသတွင်းက ရေချိုထုတ်လုပ်ရေးစက်ရုံတွေနဲ့ စွမ်းအင်ကဏ္ဍတွေကို ပြန်လည်ပစ်မှတ်ထားလာမှာကို စိုးရိမ်နေကြတာပါ။
အီရန်ဘက်ကလည်း သူတို့ရဲ့ အခြေခံအဆောက်အအုံတွေ အတိုက်ခိုက်ခံရရင် အမေရိကန်တပ်စခန်းတွေရှိတဲ့ အိမ်နီးချင်းနိုင်ငံတွေက စွမ်းအင်နဲ့ IT စနစ်တွေကိုပါ တရားဝင်ပစ်မှတ်အဖြစ် သတ်မှတ်ပြီး ပြန်လည်တိုက်ခိုက်မယ်လို့ ပြီးခဲ့တဲ့ မတ်လ ၂၂ ရက်နေ့က သတိပေးထားပါတယ်။
ထရမ့်က ဆွေးနွေးမှုတွေ ဆက်လုပ်ဖို့ ၅ ရက် အချိန်ဆွဲထားပေမယ့် အီရန်ဘက်က စစ်ရေးအရ အသင့်ပြင်ထားဆဲဖြစ်သလို ဟော်မုဇ်ရေလက်ကြားကိုလည်း အပြီးတိုင် ပိတ်ပစ်မယ်လို့ ခြိမ်းခြောက်ထားပါတယ်။
