Border News Agency
အီရန်၊ မတ် ၂၅။
အီရန်နိုင်ငံ၊ တီဟီရန်မြို့ရှိ ထိုင်းသံရုံးက ဟော်မုဇ်ရေလက်ကြားကို ဖြတ်သန်းမယ့် ထိုင်းကုန်တင်သင်္ဘောတွေကို အီရန်အစိုးရက ဘေးကင်းလုံခြုံစွာသွားလာခွင့်ပြုလိုက်ပြီလို့ မတ်လ ၂၄ ရက်၊မနေ့ကအတည်ပြု ပြောကြားလိုက်ပါတယ်။
အဲဒီလိုခွင့်ပြုပေးတာဟာ ထိုင်း၊အီရန်နဲ့ အိုမန်နိုင်ငံတို့အကြား နီးနီးကပ်ကပ် ညှိနှိုင်းဆောင်ရွက်မှုတွေရဲ့ရလဒ်ဖြစ်ပြီး အီရန်ဘက်ကလည်း ထိုင်းနိုင်ငံနဲ့ ရှိရင်းစွဲ ချစ်ကြည်ရေးကို အလေးထားတဲ့အတွက် အခုလို လမ်းဖွင့်ပေးလိုက်တာလို့ ဆိုပါတယ်။
ပြီးခဲ့တဲ့ မတ်လ ၁၁ ရက်နေ့က ထိုင်းကုန်တင်သင်္ဘော “Mayuree Naree” ဟာ အီရန်တော်လှန်ရေးအစောင့်တပ် (IRGC) ရဲ့ ဒုံးကျည်နဲ့ ပစ်ခတ်မှုကို ခံခဲ့ရလို့ သင်္ဘောသား ၂၃ ဦး စွန့်ခွာခဲ့ရပြီး အဲဒီထဲက ပိတ်မိနေတဲ့ထိုင်းသင်္ဘောသား ၃ ဦးကိုလည်း ခုအခါ အီရန်နဲ့ အိုမန်တပ်ဖွဲ့တွေက သွားရောက် ကူညီနိုင်ခဲ့တယ်လို့ဆိုပါတယ်။
ထိုင်းနိုင်ငံခြားရေးဝန်ကြီးဌာနဘက်ကလည်း သူတို့အနေနဲ့ ဒီပဋိပက္ခမှာ ဘယ်ဘက်ကမှ ပါဝင်ပတ်သက်တာမရှိကြောင်းနဲ့ ထိုင်းသင်္ဘောတွေလွတ်လပ်စွာ သွားလာခွင့်ရဖို့ အီရန်သံအမတ်ကြီးနဲ့ တွေ့ဆုံကာ တရားဝင် အကြောင်းကြားထားပြီး ဖြစ်ပါတယ်။
အီရန်အစိုးရကတော့ နောက်နောင်မှာ ထိုင်းသင်္ဘောတွေ ဒီရေလက်ကြားကို ဖြတ်သန်းမယ်ဆိုရင် ကြိုတင်စာရင်းပေးပို့ဖို့ တောင်းဆိုထားပြီး လိုအပ်တဲ့ကူညီဆောင်ရွက်မှုတွေ အားလုံးကို လုပ်ဆောင်ပေးသွားမယ်လို့ ကတိပြုထားပါတယ်။
