Border News Agency
ကွတ်ခိုင်၊ မတ် ၂၆။
ရှမ်းပြည်မြောက်ပိုင်း၊ ကွတ်ခိုင်ခရိုင်အတွင်းက ကျေးရွာတွေမှာ ဒေသပြန်လည်ထူထောင်ရေးနဲ့ စိုက်ပျိုးရေးလုပ်ငန်းတွေ ပြန်စနိုင်ဖို့အတွက် ကိုးကန့် (MNDAA) အုပ်ချုပ်ရေးအဖွဲ့တွေက ဒေသခံတွေနဲ့ တွေ့ဆုံခဲ့တယ်လို့ မတ်လ ၂၆ ရက်၊ဒီနေ့ထုတ်ပြန်ပါတယ်။
မတ်လ ၂၂ ရက်ကနေ ၂၃ ရက်အတွင်း ပြုလုပ်တဲ့ ဒီတွေ့ဆုံပွဲမှာ ဒေသခံတွေ နားလည်စေဖို့ မြန်မာ၊ တရုတ်နဲ့ တအာင်း ဘာသာစကား ၃ မျိုးနဲ့ ဘာသာပြန် ရှင်းလင်းပေးခဲ့တယ်လို့ဆိုပါတယ်။
အဲဒီတွေ့ဆုံပွဲမှာ အုပ်ချုပ်ရေးအဖွဲ့ တာဝန်ရှိသူတွေက ဒေသတွင်း တိုင်းရင်းသားတွေ တန်းတူညီမျှရေး၊ပညာရေးနဲ့ ရိုးရာယဉ်ကျေးမှုဆိုင်ရာ ကိစ္စရပ်တွေကို ပြောကြားခဲ့သလို မူးယစ်ဆေးဝါးနဲ့ အွန်လိုင်းငွေလိမ်လုပ်ငန်းတွေကိုလည်း ဆက်လက်နှိမ်နင်းသွားမယ်လို့ ဆိုပါတယ်။
ဒါ့အပြင် လက်ရှိနွေဦးစပါးစိုက်ပျိုးရာသီမှာ တောင်သူတွေအတွက် လိုအပ်တဲ့ ဓာတ်မြေဩဇာတွေကို အုပ်ချုပ်ရေးကော်မတီက ထုတ်ချေးပေးခဲ့ပြီး သက်ကြီးရွယ်အိုတွေကိုလည်း အာဟာရနဲ့ ငွေကြေးအချို့ ထောက်ပံ့ခဲ့တယ်လို့ ဆိုပါတယ်။
ဒီလို လူထုတွေ့ဆုံပွဲတွေကို ကွတ်ခိုင်ခရိုင်အတွင်းက တခြားမြို့နယ်တွေမှာလည်း ဆက်လက်လုပ်ဆောင်သွားမယ်လို့ ဆိုပါတယ်။
