Border News Agency
အစ္စရေး၊ မတ်လ ၂၇ ။
အစ္စရေးစစ်တပ်ဟာ အီရန်အစိုးရ ပြုတ်ကျသွားအောင် လုပ်ဆောင်မယ့် မူလဗျူဟာကို လက်လွှတ်လိုက်ပြီး အီရန်ရဲ့ စစ်အင်အားနဲ့လက်နက်ထုတ်လုပ်နိုင်စွမ်းတွေကို နောင်ဆယ်စုနှစ်ချီ နလန်မထူနိုင်တော့အောင် အမြစ်ဖြတ်ချေမှုန်းမယ့် ဗျူဟာသစ်ကို ပြောင်းလဲကျင့်သုံးလာတယ်လို့ နိုင်ငံတကာသတင်းတွေမှာဖော်ပြပါတယ်။
အမေရိကန်သမ္မတ ဒေါ်နယ်ထရန့်က စစ်ပွဲကို အမြန်ဆုံးရပ်တန့်ဖို့ ဖိအားပေးလာနိုင်တာကြောင့် အစ္စရေးအနေနဲ့ အပစ်အခတ်မရပ်စဲမီအချိန်တိုအတွင်းမှာ အီရန်ရဲ့ စစ်လက်နက်စက်ရုံတွေကို အပြတ်ရှင်းပစ်ဖို့ ရည်ရွယ်နေတာပါ။
အစ္စရေးဟာ အီရန်ရဲ့ ဒုံးကျည်နဲ့ ဒရုန်းထုတ်လုပ်တဲ့ စက်ရုံတွေ၊ စစ်တပ်ကို ထောက်ပံ့ပေးနေတဲ့စွမ်းအင်ကဏ္ဍတွေနဲ့ ရုရှားကို လက်နက်ပို့ဆောင်ပေးနေတဲ့ ဆိပ်ကမ်းတွေကို အဓိကထား တိုက်ခိုက်နေပါတယ်။
အီရန်ပြည်သူတွေ အစိုးရကိုပြန်လည်တော်လှန်လာအောင် မျှော်လင့်ခဲ့တဲ့ ဗျူဟာထက် အခုအခါမှာတော့ အီရန်စစ်တပ်မှာ အစွယ် မရှိတော့အောင်လက်တွေ့ကျကျ ဖျက်ဆီးပစ်ဖို့ အစ္စရေးက ဆုံးဖြတ်လိုက်တာ ဖြစ်ပါတယ်။
ဒါဟာ အမေရိကန်ရဲ့ဖိအားကြောင့် ငြိမ်းချမ်းရေးဆွေးနွေးပွဲတွေ မစတင်ခင်မှာ အီရန်ရဲ့စစ်ရေးအခြေခံအဆောက်အအုံတွေကို အပြီးတိုင်ချေမှုန်းထားနိုင်ဖို့ အစ္စရေးက အပြင်းအထန် ကြိုးစားနေတာပဲ ဖြစ်ပါတယ်။
