Border News Agency
အမေရိကန်၊ ဧပြီ ၁။
ဖလော်ရီဒါပြည်နယ်အုပ်ချုပ်ရေးမှူး ရွန်ဒီဆန်းတစ်ဟာ Palm Beach အပြည်ပြည်ဆိုင်ရာလေဆိပ်ကိုဒေါ်နယ်ဂျေထရန့် အပြည်ပြည်ဆိုင်ရာလေဆိပ်အဖြစ် အမည်ပြောင်းလဲမယ့် ဥပဒေကြမ်းကို လက်မှတ်ရေးထိုး အတည်ပြုလိုက်ပြီလို့ NBC News က ဖော်ပြထားပါတယ်။
အဲဒီအမည်ပြောင်းလဲမှုဟာ လာမယ့် ဇူလိုင်လ ၁ ရက်နေ့မှာ စတင်အသက်ဝင်မှာဖြစ်ပြီး ထရန့်ရဲ့ Mar-a-Lago အပန်းဖြေစခန်းနဲ့ ၅ မိုင်ခန့်သာ ဝေးတဲ့ ဒီလေဆိပ်ကို ထရန့်ကိုယ်တိုင်လည်း အမြဲတမ်း အသုံးပြုနေတာ ဖြစ်ပါတယ်။
ထရန့်ရဲ့သားဖြစ်သူ အဲရစ်ထရန့်ကတော့ ဒီလိုအမည်ပြောင်းလဲနိုင်ခဲ့တဲ့အပေါ် အရမ်းဂုဏ်ယူကြောင်း လူမှုကွန်ရက်ကနေ ပြောကြားခဲ့သလို ထရန့်အဖွဲ့အစည်းကလည်း လေဆိပ်အမည်သစ်အတွက် ကုန်အမှတ်တံဆိပ်ပါ မှတ်ပုံတင်ထားပြီး ဖြစ်ပါတယ်။
ဒါပေမယ့် ဒီလုပ်ရပ်ဟာ အစိုးရအခွန်ငွေ ဒေါ်လာ ၅ သန်းလောက် အကုန်အကျများမှာဖြစ်လို့ ဒီမိုကရက်တစ်ပါတီဘက်ကတော့ ဒါဟာ ငွေဖြုန်းတာပဲလို့ ပြင်းပြင်းထန်ထန် ဝေဖန်ကန့်ကွက်နေကြပါတယ်။
လက်ရှိမှာ ဒေါ်နယ်ထရန့်ရဲ့အမည်ကို အစိုးရအဆောက်အအုံတွေနဲ့ ငွေစက္ကူတွေပေါ်မှာပါ ထည့်သွင်းဖို့ ကြိုးပမ်းမှုတွေ ရှိနေတာကြောင့် အခုလေဆိပ်အမည်ပြောင်းတာဟာလည်း ထရန့်ရဲ့ဩဇာကို ပြသတဲ့ လုပ်ဆောင်ချက်တခု ဖြစ်လာပါတယ်။
