Border News Agency
နေပြည်တော်၊ ဧပြီ ၆ ။
မန္တလေးမြို့နဲ့ စစ်ကိုင်းတိုင်း၊ ကလေးမြို့မှာ ကာလတန်ဖိုးကျပ် ၁ ဒသမ ၅၅ ဘီလီယံတန်ဖိုးရှိ ဓာတုပစ္စည်း (ကဖင်း) ၄ ဒသမ ၈ တန်ကျော်ကို စစ်ကော်မရှင်တပ်ဖမ်းမိခဲ့တယ်လို့ ဧပြီလ ၅ ရက်၊မနေ့ကထုတ်ပြန်ပါတယ်။
အဲဒီမန္တလေး၊ချမ်းအေးသာစံမြို့နယ်ရှိ နေအိမ်တအိမ်မှာ မတ်လ ၂၁ ရက်နေ့က ကဖင်း ၁ တန်ကျော်ကိုစတင်ဖမ်းမိတာဖြစ်ပြီး သယ်ဆောင်ပေးသူနဲ့ ပိုင်ရှင်အပါအဝင် လူ ၆ ဦးကို မန္တလေးမြို့မှာ ထပ်မံဖမ်းဆီးနိုင်ခဲ့တယ်လို့ဆိုပါတယ်။
အဲဒီဖမ်းမိသူတွေရဲ့ ထွက်ဆိုချက်အရ ကလေးမြို့၊ စမ်းမြို့ရပ်ကွက်ရှိ နေအိမ်တအိမ်ကနေ ကဖင်း ၃ ဒသမ ၈ တန်ကို ထပ်မံဖော်ထုတ်နိုင်ခဲ့သလို ကလေးမြို့မှာရှိတဲ့ ဆက်စပ်တရားခံ ၅ ဦးကိုလည်း ကား ၂ စီးနဲ့အတူ ဖမ်းဆီးရမိခဲ့ပါတယ်။
အဲဒီဓာတုပစ္စည်းတွေကို အိန္ဒိယ-မြန်မာနယ်စပ်၊ ရိဒ်ခေါဒါရ်မြို့မှ ကလေးမြို့ကတဆင့် မန္တလေးမြို့ကို တင်သွင်းရောင်းချနေတာလို့ဆိုပါတယ်။
အဲဒီဖမ်းဆီးရမိသူတွေကို မူးယစ်ဆေးဝါးဥပဒေနဲ့ အရေးယူထားပြီးအဓိကတာဝန်ရှိသူ ရိဒ်ခေါဒါရ်မြို့နေ အမျိုးသမီးတဦးအပါအဝင် ကွင်းဆက်တရားခံတွေကို ဆက်စုံစမ်းနေတယ်လို့ဆိုပါတယ်။
