Border News Agency
ဘေရွတ်၊ ဧပြီ ၉။
အစ္စရေးစစ်တပ်ဟာ လက်ဘနွန်နိုင်ငံအတွင်းက နေရာအများအပြားကို စစ်ပွဲစတင်ကတည်းက အပြင်းအထန် လေကြောင်းတိုက်ခိုက်တာတွေ ပြုလုပ်ခဲ့တာကြောင့် လူပေါင်း ၃၀၀ ကျော် သေဆုံး၊ဒဏ်ရာရသွားပြီလို့ ဒေသတွင်းမီဒီယာတွေမှာဖော်ပြပါတယ်။
အဲဒီတိုက်ခိုက်မှုဟာ ၁၀ မိနစ်အတွင်းမှာတင် ပစ်မှတ်ပေါင်း ၁၀၀ ကျော်ကို တိုက်ခိုက်ခံရတာဖြစ်ပြီး မြို့တော်ဘေရွတ်အပါအဝင် နိုင်ငံတောင်ပိုင်းနဲ့ အရှေ့ပိုင်းဒေသတွေမှာ အပြင်းအထန် ထိခိုက်ပျက်စီးခဲ့တယ်လို့ဆိုပါတယ်။
လက်ဘနွန်ကျန်းမာရေးဝန်ကြီးဌာနရဲ့ ထုတ်ပြန်ချက်အရ နိုင်ငံတစ်ဝှမ်းက ဆေးရုံတွေမှာ ဒဏ်ရာရသူတွေနဲ့ ပြည့်နှက်နေပြီး အရေးပေါ် ကုသမှုတွေ လုပ်ဆောင်နေရတယ်လို့ဆိုပါတယ်။
အစ္စရေးဘက်ကတော့ ဒါဟာ ဟစ်ဇ်ဘိုလာအဖွဲ့ရဲ့ စစ်ရေးအခြေစိုက်စခန်းတွေကို ပစ်မှတ်ထားတာလို့ ဆိုပေမဲ့ ကြိုတင်သတိပေးချက်မရှိဘဲ ဗုံးကြဲခဲ့တာကြောင့် အရပ်သား ထိခိုက်မှုတွေ များပြားခဲ့တာ ဖြစ်ပါတယ်။
အမေရိကန်နဲ့ အီရန်တို့ကြား နှစ်ပတ်ကြာ အပစ်အခတ်ရပ်စဲဖို့ သဘောတူညီချက် ထွက်ပေါ်လာပြီး နာရီပိုင်းအကြာမှာပဲ ယူအေအီး (UAE)၊ ကူဝိတ်နဲ့ ဘာရိန်းနိုင်ငံတွေဆီကို ဒရုန်းနဲ့ ဒုံးကျည်တွေနဲ့ တိုက်ခိုက်မှုတွေ ရှိခဲ့တယ်လို့ နိုင်ငံတကာသတင်းတွေမှာ ဖော်ပြပါတယ်။
ယူအေအီး ကာကွယ်ရေးဝန်ကြီးဌာနကတော့ အီရန်ဘက်ကလာတဲ့ ဒုံးကျည်နဲ့ ဒရုန်းတွေကို ကြားဖြတ်ပစ်ချခဲ့ရပြီး အပျက်အစီးတွေကြောင့် အဘူဒါဘီရှိ ဂတ်စ်စက်ရုံတစ်ခုမှာ မီးလောင်မှုဖြစ်ပွားကာ လူ ၃ ဦး ဒဏ်ရာရရှိခဲ့တယ်လို့ ထုတ်ပြန်ထားပါတယ်။
ကူဝိတ်နိုင်ငံမှာလည်း အီရန်ဒရုန်း ၂၈ စီးကို ကြားဖြတ်ဟန့်တားခဲ့ရပြီး ရေနံစက်ရုံနဲ့ လျှပ်စစ်ဓာတ်အားပေးစက်ရုံတချို့ ထိခိုက်ပျက်စီးခဲ့သလို၊ဘာရိန်းနိုင်ငံ မြို့တော် မနားမားမှာလည်း ပေါက်ကွဲသံတွေ ကြားခဲ့ရပြီး စွမ်းအင်ကဏ္ဍဆိုင်ရာ အဆောက်အအုံတချို့ မီးလောင်ခဲ့တယ်လို့ဆိုပါတယ်။
