Border News Agency
မန္တလေး၊​ ဧပြီ ၁၀။

​မန္တလေးတိုင်း၊ မြင်းခြံမြို့နယ်၊ ဖက်ပင်အိုင်ကျေးရွာကို စစ်ကော်မရှင်တပ်ကဝင်ရောက်စီးနင်းပြီး အရပ်သား ၁၁ ဦးကို ရက်ရက်စက်စက် သတ်ဖြတ်ခဲ့တဲ့ လုပ်ရပ်ဟာ စစ်ရာဇဝတ်မှု ကျူးလွန်တာဖြစ်လို့ ကျူးလွန်သူတွေကို အရေးယူနိုင်ဖို့ အစွမ်းကုန် ကြိုးစားသွားမယ်လို့ NUG လူ့အခွင့်အရေးဝန်ကြီးဌာနက ဧပြီလ ၉ ရက်၊မနေ့ကထုတ်ပြန်ပါတယ်။

စစ်​ကော်မရှင်တပ်ရဲ့တပ်မ ၉၉ နဲ့ ပျူစောထီး အင်အား ၃၀၀ နီးပါးဟာ ဖက်ပင်အိုင်ရွာကို ဧပြီလ ၁ ရက်နေ့က စစ်ကြောင်းထိုးခဲ့တာဖြစ်ပြီး ရွာထဲက နေအိမ် ၂၁၀ လုံးနဲ့ သိန်းပေါင်း ၈ သောင်းကျော်တန်ဖိုးရှိတဲ့ ဆေးရွက်ကြီး သိုလှောင်ရုံတွေကို မီးရှို့ဖျက်ဆီးခဲ့တယ်လို့ ဆိုပါတယ်ယ

​အဲဒီအပြင်ရွာထဲက သက်ကြီးပိုင်းတွေအပါအဝင် အရပ်သားတွေကို သေနတ်တွေ၊ ဒရုန်းတွေနဲ့ ပစ်ခတ်သတ်ဖြတ်ခဲ့တာဖြစ်ပြီး သေဆုံးသူတွေရဲ့ အလောင်းတွေကိုတောင် မိသားစုထံ ပြန်မပေးဘဲ မီးပုံရှို့ဖျက်ဆီးခဲ့တယ်လို့ ဆိုပါတယ်။

အဲဒီဖြစ်စဉ်အတွင်းမှာ အမျိုးသား ၇ ဦးနဲ့ အမျိုးသမီး ၄ ဦး၊ စုစုပေါင်း ၁၁ ဦး သေဆုံးခဲ့ရပြီး ဒဏ်ရာရသူ ၇ ဦး ရှိခဲ့သလို ပိတ်မိနေသူတွေကို ဝင်ရောက်ကယ်ဆယ်တဲ့ ပြည်သူ့ကာကွယ်ရေးတပ်ဖွဲ့ဝင် ၃ ဦးလည်း ကျဆုံးခဲ့ရတယ်လို့ဆိုပါတယ်။

အခုလို အရပ်သားတွေကို ပစ်မှတ်ထားပြီး လူမှုစီးပွားဘဝတခုလုံးကို ဖျက်ဆီးလိုက်တာဟာ လူသားချင်းစာနာမှု လုံးဝကင်းမဲ့တဲ့ လုပ်ရပ်ဖြစ်တာကြောင့် တရားမျှတမှု ရရှိအောင် တာဝန်ယူ ဆောင်ရွက်သွားမယ်လို့ NUG က အသိပေးထားပါတယ်။