Border News Agency
နမ့်ခမ်း၊ မေ ၃၁။
ရှမ်းပြည်မြောက်ပိုင်း၊ နမ့်ခမ်းမြို့နယ်၊ ကောင်းတပ်ကျေးရွာမှာ ဖြစ်ပွားခဲ့တဲ့ ပြင်းထန်တဲ့ပေါက်ကွဲမှုဟာ မိုင်းတွင်းကျောက်ထုတ်လုပ်ရေးလုပ်ငန်းတွေမှာအသုံးပြုဖို့ သိုလှောင်ထားတဲ့ ယမ်းတွေမတော်တဆပေါက်ကွဲခဲ့တာလို့ တအာင်းတပ်မတော်က ထုတ်ပြန်ပါတယ်။
အဲဒီကောင်းတပ်ကျေးရွာမှာ မေလ ၃၁ ရက်၊ ဒီနေ့ နေ့လည် ၁ နာရီအချိန်ကဖြစ်ပွားခဲ့တဲ့ ပေါက်ကွဲမှုကြောင့် အရပ်သားအများအပြားသေဆုံး၊ ဒဏ်ရာရသူတွေရှိခဲ့သလို နေအိမ်တွေလည်း ပျက်စီးဆုံးရှုံးခဲ့ရတယ်လို့ဆိုပါတယ်။
အဲဒီပေါက်ကွဲမှုဖြစ်ပွားခဲ့တဲ့ ယမ်းတွေဟာ PSLF/TNLA စီးပွားရေးဌာနရဲ့ မိုင်းတွင်းကျောက်ထုတ်လုပ်ရေးလုပ်ငန်းတွေမှာ အသုံးပြုဖို့ သိုလှောင်ထားတဲ့ ပစ္စည်းတွေဖြစ်ပြီး အသက်ဆုံးရှုံးထိခိုက်ခဲ့ရသူတွေအတွက် များစွာဝမ်းနည်းပူဆွေးရတယ်လို့ဆိုပါတယ်။
အခုလိုပေါက်ကွဲမှုဖြစ်ပွားရတဲ့ အကြောင်းရင်းတွေကို အသေးစိတ်စုံစမ်းစစ်ဆေးနေပြီး တာဝန်ရှိသူတွေကို ဥပဒေနဲ့အညီအရေးယူဆောင်ရွက်သွားမယ်လို့ ဆိုပါတယ်။
ဒါ့အပြင်ပေါက်ကွဲမှုကြောင့် ထိခိုက်ဆုံးရှုံးခဲ့ရတဲ့ ပြည်သူတွေအတွက် ကူညီကယ်ဆယ်ရေး၊ ကျန်းမာရေးစောင့်ရှောက်မှုနဲ့ပြန်လည်ထူထောင်ရေးလုပ်ငန်းတွေကို သက်ဆိုင်ရာဌာနတွေနဲ့ ပူးပေါင်းပြီး အမြန်ဆုံးဆောင်ရွက်နေတယ်လို့လည်း ဆိုပါတယ်။
