Border News Agency
ထိုင်း၊ မေ ၃၁။
ထိုင်းနိုင်ငံ၊ ဖိစနုလောက်ပြည်နယ်အတွင်း ပြုလုပ်တဲ့အကြီးစားမူးယစ်ဆေးဝါးနှိမ်နင်းရေး စစ်ဆင်ရေးတခုမှာ ဘတ်သန်း ၂၀၀ ကျော်တန်ဖိုးရှိတဲ့ အိုက်စ် ၁ ဒသမ ၇၄ တန်နဲ့ ကက်တမင်း ၅၀ ကီလိုဂရမ်ကို ဖမ်းဆီးရမိခဲ့ပြီး မူးယစ်မှောင်ခိုဂိုဏ်းဝင် ၃ ဦးကိုလည်း ဖမ်းဆီးရမိခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီချင်းရိုင်းပြည်နယ်ကနေ ထိုင်းနိုင်ငံအလယ်ပိုင်းကို မူးယစ်ဆေးဝါးတွေသယ်ဆောင်လာတဲ့ ဆီတင်တွဲကားတစီးကို မေလ ၂၉ ရက်နေ့ကရဲတပ်ဖွဲ့က ကြားဖြတ်စစ်ဆေးရာကနေ အခုလို ဖမ်းဆီးရမိခဲ့တာဖြစ်ပြီး လမ်းကင်းထောက်ဖို့ အသုံးပြုတဲ့ အစောင့်ယာဉ်တစီးကိုလည်း အတူတူသိမ်းဆည်းရမိခဲ့တာ ဖြစ်ပါတယ်။
အဲဒီမူးယစ်ဆေးဝါးတွေကို ဘန်ကောက်မြို့နဲ့ အနီးတဝိုက် ပြည်နယ်တွေမှာဖြန့်ဖြူးဖို့ သယ်ဆောင်လာတာဖြစ်ပြီး ဖမ်းဆီးရမိသူတွေထဲက ပူးပေါင်းညှိနှိုင်းပေးသူတဦးက ချင်းရိုင်းကနေမူးယစ်ဆေးဝါးတွေ သယ်ယူပေးဖို့ ဘတ် ၆ သိန်း ရရှိခဲ့တယ်လို့ ဝန်ခံထားပါတယ်။
အဲဒီအပြင်ကျန်တဲ့တရားခံ ၂ ဦးကတော့ ဒီမှောင်ခိုလုပ်ငန်းကို ၄ ကြိမ်မြောက်လုပ်ဆောင်ဖူးတာဖြစ်ပြီး အရင် ၃ ကြိမ်စလုံးမှာတော့ အောင်မြင်အောင် သယ်ဆောင်နိုင်ခဲ့တယ်လို့ ရဲတပ်ဖွဲ့ကို ထွက်ဆိုထားပါတယ်။
အဲဒီဖမ်းဆီးရမိသူ ၃ ဦးစလုံးကို မူးယစ်ဆေးဝါး လက်ဝယ်ထားရှိမှု၊ ဖြန့်ဖြူးဖို့ ကြံစည်မှုတွေနဲ့ အမှုဖွင့်ထားပြီး ဒီမူးယစ်ကွန်ရက်မှာ ပါဝင်ပတ်သက်နေသူတွေကို ထပ်မံဖော်ထုတ်နိုင်ဖို့ ရဲတပ်ဖွဲ့က ဆက်လက်စုံစမ်းစစ်ဆေးနေပါတယ်။
