Border News Agency
အန္ဒိယ၊ မေ ၃၁။
မြန်မာနိုင်ငံအတွက် လိုအပ်တဲ့ရင်းနှီးမြှုပ်နှံမှုကဏ္ဍတွေမှာ မိတ်ဖက်စီးပွားရေးလုပ်ငန်းရှင်တွေ လာရောက်လုပ်ကိုင်ရင် ဦးစားပေးဝန်ဆောင်မှုပေးမယ်လို့ မင်းအောင်လှိုင်ကပြောပါတယ်။
အိန္ဒိယလုပ်ငန်းရှင်တွေကို အိန္ဒိယနိုင်ငံ၊ နယူးဒေလီမြို့မှာ ပြုလုပ်တဲ့ မြန်မာ – အိန္ဒိယ နှစ်နိုင်ငံ စီးပွားရေးဆွေးနွေးပွဲအတွင်း သူက အခုလို ထည့်သွင်းပြောကြားခဲ့တာ ဖြစ်ပါတယ်။
မင်းအောင်လှိုင်က ဓာတ်မြေဩဇာ၊ ဘိလပ်မြေ၊ သံမဏိ၊ လျှပ်စစ်သုံးယာဉ် (EV)၊ စိုက်ပျိုးမွေးမြူရေး၊ ဆေးဝါးနဲ့ ဆေးပစ္စည်းကိရိယာအပြင် စားသုံးဆီထုတ်လုပ်တဲ့ကဏ္ဍတွေမှာ လာရောက်လုပ်ကိုင်ရင် အထူးပံ့ပိုးပေးမယ်လို့ဆိုပါတယ်။
အဲဒီအာဏာသိမ်းစစ်တပ်အနေနဲ့ လက်ရှိမှာ သတင်းအချက်အလက်နဲ့ ဆက်သွယ်ရေးနည်းပညာ (ICT)၊ ဆေးဝါးထုတ်လုပ်မှုနဲ့ စွမ်းအင်ဆိုင်ရာ အခြေခံအဆောက်အအုံတွေကို မဟာဗျူဟာမြောက် ရင်းနှီးမြှုပ်နှံမှုတွေအဖြစ် သတ်မှတ်ထားပါတယ်။
ဒါ့အပြင်စိုက်ပျိုးမွေးမြူရေး၊ ပြန်လည်ပြည့်ဖြိုးမြဲစွမ်းအင်၊ ပညာရေးနဲ့ ကျန်းမာရေးဝန်ဆောင်မှုလုပ်ငန်းတွေကိုလည်း ဦးစားပေးအဖြစ် ဖိတ်ခေါ်နေသလို ပြည်တွင်းထွက်ကုန်အခြေခံသစ်အချောထည်၊ ပရိဘောဂ၊ အထပ်သား၊ အဆင့်မြင့်ချည်နဲ့ ရာဘာအခြေခံ ထုတ်ကုန်လုပ်ငန်းတွေကိုလည်း အားပေးဆောင်ရွက်နေတယ်လို့ဆိုပါတယ်။
နောက်ပြီးအိန္ဒိယနိုင်ငံအနေနဲ့ မြန်မာနိုင်ငံမှာ ဆေးဝါးထုတ်လုပ်မှု၊ မွေးမြူရေးနဲ့ နို့ထွက်ပစ္စည်းလုပ်ငန်းတွေမှာ လာရောက်ရင်းနှီးမြှုပ်နှံဖို့၊စက်မှုဇုန်တွေ တည်ထောင်ဖို့၊ နည်းပညာလွှဲပြောင်းရယူဖို့နဲ့ သက်မွေးပညာသင်တန်းကျောင်းတွေ ပူးပေါင်းဖွင့်လှစ်ဖို့ အခွင့်အလမ်းတွေရှိနေတယ်လို့ ဆိုပါတယ်။
ကုလားတန်ဘက်စုံသုံး သယ်ယူပို့ဆောင်ရေးစီမံကိန်းနဲ့ အိန္ဒိယ – မြန်မာ – ထိုင်း သုံးနိုင်ငံအဝေးပြေးလမ်းမကြီးတို့ဟာ အာဆီယံ – အိန္ဒိယ စီးပွားရေးစင်္ကြံကို ဖွင့်လှစ်ပေးမယ့်သော့ချက်တွေဖြစ်တာကြောင့် လမ်းကြောင်းတလျှောက် အထူးစီးပွားရေးဇုန်တွေမှာ ရင်းနှီးမြှုပ်နှံဖို့လည်း ဖိတ်ခေါ်ထားပါတယ်။
အဲဒီဆွေးနွေးပွဲကို မင်းအောင်လှိုင်နဲ့အတူ အာဏာသိမ်းစစ်တပ်ရဲ့ ပြည်ထောင်စုဝန်ကြီးတွေဖြစ်တဲ့ ဦးခင်မောင်ရီ၊ ဦးတင်မောင်ဆွေ၊ ဒေါက်တာကံဇော်၊ ဦးမင်းနောင်၊ ဒေါက်တာချာလီသန်း၊ ဗဟိုဘဏ်ဥက္ကဋ္ဌ ဒေါက်တာခင်နိုင်ဦး တို့အပြင် အိန္ဒိယနိုင်ငံကူးသန်းရောင်းဝယ်ရေးနဲ့ စက်မှုဝန်ကြီးဌာနက တာဝန်ရှိသူတွေ တက်ရောက်ခဲ့ကြပါတယ်။
