Border News Agency
မဲဆောက်၊ဧပြီ ၂၂။
ထိုင်းနိုင်ငံ၊ တာ့ခ်ခရိုင်၊ မဲဆောက်မြို့ရှိ ထိုင်း-မြန်မာ အမှတ် ၁ ချစ်ကြည်ရေးတံတားရှေ့မှာ အထောက်အထားမရှိဘဲ အလုပ်လုပ်ကိုင်နေတဲ့ အသက် ၂၆ နှစ်အရွယ် မြန်မာအမျိုးသမီးတဦးကို ဧပြီလ ၂၀ ရက်နေ့မှာထိုင်းအာဏာပိုင်တွေက ဖမ်းဆီးလိုက်ပါတယ်။
တာ့ခ်ခရိုင် လူဝင်မှုကြီးကြပ်ရေးရဲတပ်ဖွဲ့နဲ့ အလုပ်သမားညွှန်ကြားရေးဦးစီးဌာနတို့ ပူးပေါင်းပြီး နယ်စပ်တလျှောက် တရားမဝင် အလုပ်သမားတွေကို ရှောင်တခင် စစ်ဆေးခဲ့ရာကနေ အခုလို ဖမ်းဆီးရမိခဲ့တာ ဖြစ်ပါတယ်။
အဲဒီအမျိုးသမီးကို ထိုင်းနိုင်ငံအတွင်း တရားမဝင် ဝင်ရောက်နေထိုင်မှု၊အလုပ်လုပ်ကိုင်ခွင့် လက်မှတ်မရှိဘဲ အလုပ်လုပ်ကိုင်မှု စတဲ့ ပုဒ်မတွေနဲ့ အမှုဖွင့်ထားပြီး လက်ရှိမှာတော့ မဲဆောက်ရဲစခန်းကို ပို့ဆောင်ထားပါတယ်။
ထိုင်းအာဏာပိုင်တွေအနေနဲ့ နယ်စပ်ဒေသလုံခြုံရေးအတွက် တရားမဝင် အလုပ်သမားတွေကို ဆက်တိုက် စစ်ဆေးဖမ်းဆီးသွားမှာဖြစ်လို့ လုပ်ငန်းရှင်တွေအနေနဲ့လည်း တရားဝင် အလုပ်သမားတွေကိုသာ ခန့်အပ်ကြဖို့ သတိပေး ပြောကြားထားပါတယ်။
