Border News Agency
အီရန်၊ ဧပြီ ၂၈။
အမေရိကန်သမ္မတ ဒေါ်နယ်ထရန့်ရဲ့ ဆွေးနွေးညှိနှိုင်းလိုတဲ့ တောင်းဆိုချက်ကို အီရန်အစိုးရကသုံးသပ်နေတယ်လို့ နိုင်ငံခြားရေးဝန်ကြီး အဘတ်စ် အရတ်ချီက ပြောကြားလိုက်ပါတယ်။
အမေရိကန်ဟာ သူတို့ရဲ့ အထူးကိုယ်စားလှယ်တွေဖြစ်တဲ့ စတိဗ်ဝစ်ကော့ဖ်နဲ့ ဂျာရတ်ကုရှ်နာတို့ရဲ့ ပါကစ္စတန်ခရီးစဉ်ကို ဖျက်သိမ်းလိုက်ပြီးနောက်မှာ အခုလို ဆွေးနွေးဖို့ ကမ်းလှမ်းလာတာပါ။
အီရန်နိုင်ငံခြားရေးဝန်ကြီးရဲ့ အဆိုအရ အမေရိကန်ဟာ စစ်ပွဲအတွင်းသူတို့မျှော်မှန်းထားတဲ့ ရည်မှန်းချက်တခုမှ အောင်မြင်အောင် မလုပ်ဆောင်နိုင်တာကြောင့် အခုလို ဆွေးနွေးပွဲဖြစ်မြောက်ဖို့ ကြိုးပမ်းလာတာဖြစ်တယ်လို့ ဆိုပါတယ်။
ဒါဟာ အမေရိကန်ရဲ့ စစ်ရေးနဲ့ သံတမန်ရေးရာ အကျပ်အတည်းကို ပြသနေတာလို့လည်း ဝေဖန်မှုတွေ ရှိနေပါတယ်။
လက်ရှိမှာတော့ အီရန်ဘက်က ဒီကမ်းလှမ်းချက်အပေါ် အလေးအနက် စဉ်းစားနေပေမယ့်တဖက်မှာလည်း ဟော်မုဇ်ရေလက်ကြား ပိတ်ဆို့ထားမှုကို ဆက်လက်ထိန်းသိမ်းထားဆဲ ဖြစ်ပါတယ်။
အီရန်ရဲ့ နျူကလီးယားအစီအစဉ်နဲ့ ပတ်သက်ပြီး အမေရိကန်ဘက်က တင်းမာတဲ့ ရပ်တည်ချက်တွေ ရှိနေတာကလည်း ဆွေးနွေးပွဲအတွက် အဓိက အတားအဆီး ဖြစ်နေပါတယ်။
သမ္မတထရန့်ကတော့ အီရန်အနေနဲ့ စစ်ပွဲကို အဆုံးသတ်ချင်ရင် သူတို့ဆီတိုက်ရိုက်ဖုန်းဆက်ပြီး ညှိနှိုင်းနိုင်တယ်လို့ ပြောဆိုထားပါတယ်။
ဒါပေမယ့် အီရန်ခေါင်းဆောင်ပိုင်းကတော့ အမေရိကန်အနေနဲ့ ခြိမ်းခြောက်တာတွေနဲ့ ရာဇသံပေးတာတွေကို အရင်ဆုံး ရပ်တန့်ဖို့ လိုအပ်တယ်လို့ တုံ့ပြန်ထားပါတယ်။
