Border News Agency
ရှမ်းပြည်၊ ဧပြီ ၂၉။
ရှမ်းမြောက်နယ်စပ်၊ဝ(UWSA)နဲ့ကိုးကန့် (MNDAA) တို့ ထိန်းချုပ်ထားတဲ့ နယ်မြေတွေမှာ တရုတ်ဘက်က သတ်မှတ်နယ်စပ်စည်းကိုကျော်ပြီး ခြံစည်းရိုးတွေကို ရှေ့တိုးခတ်လာနေတယ်လို့ ဒေသခံတွေဆီကသိရပါတယ်။
အဲဒီ ချင်းရွှေဟော်၊ ကြူကုတ်နဲ့ နမ့်တစ်ဂိတ်တွေမှာ ရှေ့တိုးလာပြီး ချင်းရွှေဟော်မှာဆိုရင် တရုတ်ဘက်က ခြံစည်းရိုးသစ်တွေအပြင် ဂိတ်သစ်ကိုပါ တိုးချဲ့ဆောက်လုပ်လာတယ်လို့ဆိုပါတယ်။
အဲဒီအပြင်အုတ်တံတိုင်းတွေကို ၃ ဆင့်အထိ မြင့်အောင်ဆောက်နေပြီး အရင်ကထက် အရှေ့ဘက်ကို ပိုရောက်လာတာကြောင့် ဒေသခံအိမ် ၃ အိမ်ခန့်ဟာ တရုတ်ခြမ်းထဲ ပါသွားတယ်လို့ ဒေသခံတွေက ဆိုပါတယ်။
ဝနယ်မြေဖြစ်တဲ့ နမ့်တစ် (မန်ခါး) ဂိတ်ဘက်မှာလည်း တရုတ်ဘက်က ခြံစည်းရိုးအသစ်တွေ ပြန်လုပ်ထားတာကို တွေ့ရတယ်လို့ဆိုပါတယ်။
အရင်ကနှစ်နိုင်ငံကြားမှာ ချောင်းတခုခြားထားပေမယ့် အခုအခါမှာတော့ အဲ့ဒီချောင်းက တရုတ်နယ်မြေထဲကို ပါဝင်သွားပြီလို့ ကိုယ်တိုင်မြင်တွေ့ခဲ့ရသူတွေက ဆိုပါတယ်။
အခုလို နယ်စပ်ခြံစည်းရိုးတွေ ရှေ့တိုးခတ်လာတာနဲ့ပတ်သက်ပြီး ဝနဲ့ ကိုးကန့်ဘက်ကတော့ တစုံတရာ ထုတ်ပြန်ပြောဆိုတာမျိုး မရှိသေးပါဘူး။
နယ်စပ်တလျှောက်မှာတော့ တရုတ်ဘက်က ဘက်ဖိုးကားတွေနဲ့ အဆက်မပြတ် ဆောက်လုပ်ရေးလုပ်ငန်းတွေ လုပ်ကိုင်နေကြတာလို့လည်းဆိုပါတယ်။
နယ်စပ်နေဒေသခံတွေကတော့ တရုတ်ဘက်က ခြံစည်းရိုးတွေကို အရင်ထက် ပိုမြင့်အောင် ဆောက်လုပ်လာတဲ့အပေါ် စောင့်ကြည့်နေကြပါတယ်။
ဒီလုပ်ရပ်ကြောင့် နယ်စပ်ဖြတ်ကျော်မှုနဲ့ ဒေသခံတွေရဲ့ မြေယာပိုင်ဆိုင်မှုတွေအပေါ် သက်ရောက်မှုရှိလာမှာကိုလည်း စိုးရိမ်နေကြပါတယ်။
