Border News Agency
ရန်ကုန်၊ ဧပြီ ၂၉။
ပြည်ပမှာအလုပ်လုပ်နေပြီး ခွင့်နဲ့ မြန်မာနိုင်ငံကို ခေတ္တပြန်လာမယ့် လုပ်သားတွေဟာ သက်ဆိုင်ရာသံရုံးထောက်ခံချက်မပါလာရင် ပြည်ပပြန်ထွက်ခွင့် ပိတ်သွားမယ်လို့ အလုပ်သမားညွှန်ကြားရေးဦးစီးဌာနက ဧပြီလ ၂၈ ရက်၊ မနေ့ကထုတ်ပြန်ပါတယ်။
အဲဒီစည်းကမ်းသစ်ဟာ လာမယ့် မေလ ၁ ရက်နေ့ကစပြီးအကျိုးသက်ရောက်မှာပါ။
ခွင့်နဲ့ပြန်လာမယ့်သူတွေဟာ မြန်မာနိုင်ငံကို မလာခင်မှာ အလုပ်ရှင်ဆီက ခွင့်စာကို ရယူပြီးသက်ဆိုင်ရာမြန်မာသံရုံး ဒါမှမဟုတ် ကောင်စစ်ဝန်ချုပ်ရုံးတွေမှာ ကြိုတင်ထောက်ခံချက် ယူထားရမှာပါ။
မိမိရှိနေတဲ့နိုင်ငံမှာ မြန်မာသံရုံးမရှိရင် အနီးဆုံးနိုင်ငံမှာရှိတဲ့ သံရုံးမှာ သွားရောက်လုပ်ဆောင်ရမှာ ဖြစ်ပါတယ်။
အဲဒီအပြင် OWIC ကတ်မှာပါတဲ့ လုပ်ငန်းခွင်အချက်အလက်တွေနဲ့ လက်ရှိဗီဇာ၊ Work Permit ပါ အချက်အလက်တွေ တူညီမှုမရှိရင်လည်း ကတ်အသစ်ပြန်လျှောက်ရမယ်လို့ ဆိုပါတယ်။
အဲဒီလိုတင်းကျပ်လိုက်တာဟာ အချို့လုပ်သားအသစ်တွေက ခွင့်ပြန်လုပ်သားအဖြစ် ဟန်ဆောင်ပြီး တရားဝင်လုပ်ထုံးလုပ်နည်းတွေကို ကျော်လွှားကာ တရားမဝင်ထွက်ခွာနေတာကြောင့်လို့ဆိုပါတယ်။
အဲဒီသတ်မှတ်ခွင့်စာနဲ့ သံရုံးထောက်ခံချက်တွေ လိမ်လည်တင်ပြတာ ဒါမှမဟုတ် ပါမလာတာမျိုး ရှိရင်တော့ ကာလတခုထိ ပြည်ပထွက်ခွင့် ပိတ်ပင်မှာဖြစ်သလို နာမည်ပျက်စာရင်း အသွင်းခံရမှာလည်းဖြစ်ပါတယ်။
