Border News Agency
ပါကစ္စတန်၊ မေ ၁။
အမေရိကန်ရေတပ်ကအီရန်ဆိပ်ကမ်းတွေကို ပိတ်ဆို့ထားတာကြောင့် ပါကစ္စတန်နိုင်ငံ၊ ကရာချိဆိပ်ကမ်းမှာ ပိတ်မိနေတဲ့ ကုန်သေတ္တာ ထောင်ပေါင်းများစွာကို အီရန်ဘက်ပို့ဆောင်နိုင်ဖို့အတွက် ပါကစ္စတန်အစိုးရကကုန်းလမ်းကုန်သွယ်ရေးလမ်းကြောင်း ၆ ခုကို တရားဝင် ဖွင့်လှစ်ပေးလိုက်ပါတယ်။
အဲဒီလမ်းကြောင်းသစ်တွေဟာ ပါကစ္စတန်ရဲ့ အဓိကဆိပ်ကမ်းတွေကနေ အီရန်နယ်စပ်ကို တိုက်ရိုက်ချိတ်ဆက်ပေးမှာဖြစ်ပြီး အထူးသဖြင့် ဂွါဒါ-ဂတ်ဒ် လမ်းကြောင်းကဆိုရင် အီရန်နယ်စပ်ကို ၂ နာရီအတွင်းရောက်နိုင်သလို ကုန်ကျစရိတ်ကိုလည်း ထက်ဝက်နီးပါး သက်သာစေမှာ ဖြစ်ပါတယ်။
အဲဒီ ဟော်မုဇ်ရေလက်ကြား ပိတ်ဆို့ခံထားရတာကြောင့် သင်္ဘောတွေဟာ အာမခံကြေး အဆမတန်ပေးနေရသလို ကုန်စည်ပို့ဆောင်ဖို့လည်း မဖြစ်နိုင်တော့တာကြောင့် အခုလိုကုန်းလမ်းကနေ ပို့ဆောင်တဲ့စနစ်က အီရန်အတွက်ရော၊ကုန်သည်တွေအတွက်ပါ အဓိက ထွက်ပေါက်တခု ဖြစ်လာပါတယ်။
ပါကစ္စတန်အနေနဲ့ အာဖဂန်နစ္စတန်နဲ့ ဆက်ဆံရေး တင်းမာနေတဲ့အချိန်မှာ အခုလို အီရန်ဘက်ကို လမ်းကြောင်းသစ်တွေ ဖွင့်လိုက်တာဟာ အာဖဂန်ကိုကျော်ဖြတ်ပြီး ဗဟိုအာရှနဲ့ အနောက်အာရှဘက်ကို ကုန်သွယ်မှုပြုနိုင်ဖို့ ခြေလှမ်းသစ်တခုလည်း ဖြစ်ပါတယ်။
ဒါပေမယ့် ဒီလမ်းကြောင်းတွေဟာ ဘာလိုချီစတန်ပြည်နယ်အတွင်းက ဖြတ်သန်းသွားရမှာဖြစ်လို့ နယ်မြေလုံခြုံရေးအရ စိန်ခေါ်မှုတွေ ရှိနေသေးသလို၊ အိန္ဒိယနိုင်ငံက လာတဲ့ကုန်စည်တွေကိုတော့ ပါကစ္စတန်က ဒီလမ်းကြောင်းတွေကနေ ဖြတ်သန်းခွင့် လုံးဝမပြုဘူးလို့လည်း သိရပါတယ်။
