Border News Agency
နေပြည်တော်၊ မေ ၁။
အာဏာသိမ်းစစ်ခေါင်းဆောင် မင်းအောင်လှိုင်က မနေ့ကကျရောက်တဲ့ ကဆုန်လပြည့်နေ့ အထိမ်းအမှတ်အဖြစ် နိုင်ငံတဝှမ်းက အကျဉ်းသားအားလုံးရဲ့ ထောင်ဒဏ်တွေကို ၆ ပုံ ၁ ပုံ လျှော့ပေါ့ပေးလိုက်တယ်လို့ သမ္မတရုံးက ထုတ်ပြန်ပါတယ်။
အဲဒီလျှော့ပေါ့မှုကြောင့် ဖမ်းဆီးထိန်းသိမ်းခံထားရတဲ့ ဒေါ်အောင်ဆန်းစုကြည်ရဲ့ ထောင်ဒဏ်ဟာလည်း ထပ်မံလျော့ကျသွားမှာ ဖြစ်ပါတယ်။
ဧပြီလ၃၀ ရက်နေ့ မှာ ထွက်ပေါ်လာတဲ့ ဒီကြေညာချက်နဲ့ပတ်သက်ပြီး ဒေါ်အောင်ဆန်းစုကြည်ရဲ့ ရှေ့နေအဖွဲ့ဝင်တဦးကတော့ အသက် ၈၀ အရွယ်ရှိပြီဖြစ်တဲ့ လူထုခေါင်းဆောင်ဟာ အခုဆိုရင် ထောင်ဒဏ် ၁၈ နှစ်ဝန်းကျင်လောက် ဆက်လက်ကျခံဖို့ ကျန်တော့တယ်လို့ ဆိုပါတယ်။
ဒေါ်အောင်ဆန်းစုကြည်ဟာ ၂၀၂၁ ခုနှစ် အာဏာသိမ်းပြီးကတည်းက ဖမ်းဆီးခံခဲ့ရတာဖြစ်ပြီး နဂိုကထောင်ဒဏ် ၃၃ နှစ် ချမှ
တ်ခံခဲ့ရရာကနေ အခုလို လွတ်ငြိမ်းခွင့်တွေကြောင့် သက်တမ်းလျော့လာတာ ဖြစ်ပါတယ်။
မင်းအောင်လှိုင်ဟာ စစ်တပ်က ဦးဆောင်ကျင်းပခဲ့တဲ့ ရွေးကောက်ပွဲအပြီးမှာ သမ္မတအဖြစ် ကျမ်းသစ္စာကျိန်ဆိုခဲ့တာဖြစ်ပြီး ဒီလဆန်းပိုင်းကလည်း အကျဉ်းသား ၄,၃၀၀ ကျော်ကိုခုလို ထောင်ဒဏ်လျှော့ပေါ့ပေးခဲ့ပါသေးတယ်။
ဒါပေမယ့် ဒီရွေးကောက်ပွဲဟာ ရိုဟင်ဂျာအပါအဝင် တိုင်းရင်းသားလူနည်းစုတွေ မဲပေးခွင့်မရဘဲ ချန်လှပ်ခံခဲ့ရသလို၊ NLD အပါအဝင် နိုင်ငံရေးပါတီ အများအပြားကိုလည်း ဖျက်သိမ်းပြီးမှ လုပ်ဆောင်ခဲ့တာကြောင့် ဝေဖန်မှုတွေနဲ့ ရင်ဆိုင်နေရတာပါ။
အာဏာသိမ်းစစ်ခေါင်းဆောင်က မြန်မာနိုင်ငံဟာ ဒီမိုကရေစီလမ်းကြောင်းပေါ် ပြန်ရောက်နေပြီလို့ ဆိုနေပေမယ့် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ စာရင်းတွေအရ အာဏာသိမ်းပြီးကတည်းက နိုင်ငံရေးပုဒ်မတွေနဲ့ အကျဉ်းချခံထားရသူပေါင်း ၃၀,၀၀၀ ကျော်အထိ ရှိနေဆဲ ဖြစ်ပါတယ်။
ဒေါ်အောင်ဆန်းစုကြည်ဟာ ပြင်ပနဲ့ အဆက်အသွယ် လုံးဝဖြတ်တောက်ခံထားရသလို ကျန်းမာရေး အခြေအနေနဲ့ ပတ်သက်ပြီးတော့လည်း မိသားစုဝင်တွေက စိုးရိမ်နေကြပါတယ်။
အာဏာသိမ်းစစ်တပ်ကအခုလို ထောင်ဒဏ်တွေ လျှော့ပေးနေပေမယ့် နိုင်ငံရေးအရ အကျပ်အတည်းတွေကတော့ ပြေလည်သွားတာမရှိသေးဘူးလို့ သုံးသပ်နေကြပါတယ်။
