Border News Agency
ချင်းမိုင်၊ သြဂုတ် ၁၁။
ထိုင်းနိုင်ငံ၊ချင်းမိုင်မြို့၊ချန်ဖွန့်ရပ်ကွက်မှာ သင်္ဘောသီးထောင်းရောင်းနေတဲ့ မြန်မာအမျိုးသမီးတဦးကို ဖမ်းဆီးလိုက်တယ်လို့ ချင်းမိုင်လူဝင်မှုကြီးကြပ်ရေးဌာနက သြဂုတ်လ ၁၀ ရက်၊မနေ့ကထုတ်ပြန်ပါတယ်။
အဲဒီမြန်မာအမျိုးသမီးကို ထိုင်းဒေသခံတဦးရဲ့ သတင်းပေးချက်အရ ဩဂုတ်လ ၁၀ ရက်နေ့မှာ သွားရောက်စစ်ဆေးခဲ့တာပါ။
စစ်ဆေးချိန်မှာ သူရဲ့စာရွက်စာတမ်းမှာ ကာယလုပ်သားလို့သာပါရှိပေမယ့် နိုင်ငံခြားသားတွေလုပ်ခွင့်တားမြစ်ထားတဲ့ ကုန်ပစ္စည်းရောင်းချတဲ့ အလုပ်ကိုလုပ်နေတာတွေ့ခဲ့ရပါတယ်။
ဖမ်းဆီးခံရသူမြန်မာအမျိုးသမီးကတော့ ဒီနေရာမှာအလုပ်လုပ်နေတာတနှစ်နီးပါးရှိပြီဖြစ်ပြီး တရက်ကို လုပ်ခဘတ်သုံးရာ့ငါးဆယ်ရကြောင်းနဲ့ အလုပ်ရှင်ပြောင်းတာကို အကြောင်းမကြားထားဘူးလို့ဝန်ခံထားပါတယ်။
သူ့ကိုခွင့်ပြုထားတဲ့ အလုပ်ထက်ကျော်လွန်လုပ်ကိုင်မှု၊အလုပ်နေရာပြောင်းတာကို အကြောင်းမကြားမှုတို့နဲ့ အရေးယူဖို့ ချန်ဖွန့်ရဲစခန်းကို ပို့ဆောင်ထားပါတယ်။
