Border News Agency
အီရန်၊ မေ ၈။
အမေရိကန်နဲ့အစ္စရေးတို့ ဆင်နွှဲနေတဲ့ စစ်ပွဲကို အဆုံးသတ်ဖို့အတွက် အမေရိကန်ဘက်က တင်ပြထားတဲ့ ငြိမ်းချမ်းရေးအဆိုပြုချက်ကို အီရန်အစိုးရက လက်ခံရရှိထားပြီး လက်ရှိမှာ သေချာပြန်လည်စိစစ်နေတယ်လို့ သိရပါတယ်။
အဲဒီအဆိုပြုချက်ဟာ စစ်ပွဲကိုတရားဝင်ရပ်တန့်ဖို့ ရည်ရွယ်တာဖြစ်ပေမယ့် အီရန်ရဲ့ နျူကလီးယားအစီအစဉ်နဲ့ ဟော်မုဇ်ရေလက်ကြားအရေးလို အဓိကပြဿနာတွေကတော့ ပြေလည်မှုမရသေးပါဘူး။
သမ္မတထရမ့်ကတော့ အီရန်ဘက်က သဘောတူညီချက်တခု ရချင်နေပြီလို့ ယုံကြည်နေပြီး ပြီးခဲ့တဲ့ ၂၄ နာရီအတွင်းမှာ ဆွေးနွေးမှုတွေ အတော်လေး အဆင်ပြေခဲ့တယ်လို့ အိမ်ဖြူတော်မှာ ပြောကြားခဲ့ပါတယ်။
ဒါ့အပြင် ငြိမ်းချမ်းရေးဆွေးနွေးမှုတွေ တိုးတက်လာတာကြောင့် ဟော်မုဇ်ရေလက်ကြား ပြန်ဖွင့်ဖို့ လုပ်ဆောင်နေတဲ့ Project Freedomအစီအစဉ်ကိုလည်း ခေတ္တရပ်နားထားပါတယ်။
အမေရိကန်မီဒီယာတွေရဲ့ အဆိုအရ နှစ်ဖက်စလုံးဟာ အချက် ၁၄ ချက်ပါဝင်တဲ့ သဘောတူညီချက်မူကြမ်းကို လက်မှတ်ထိုးဖို့ နီးစပ်နေတယ်လို့ ဆိုပါတယ်။
အဲဒီထဲမှာ အီရန်အနေနဲ့ နျူကလီးယားလက်နက် မထုတ်လုပ်ဖို့နဲ့ ယူရေနီယံသန့်စင်တာတွေကို ၁၂ နှစ်ကြာ ရပ်ဆိုင်းထားဖို့ ပါဝင်သလို အမေရိကန်ဘက်ကလည်း ပိတ်ဆို့မှုတွေ ပြန်ဖွင့်ပေးပြီး အီရန်ရဲ့ အေးခဲထားတဲ့ ငွေကြေးတွေကို ပြန်လွှတ်ပေးဖို့ ပါဝင်ပါတယ်။
ဒါပေမယ့် အီရန်လွှတ်တော်အမတ်တွေကတော့ ဒီအဆိုပြုချက်ဟာ လက်တွေ့ထက်စာရင် အမေရိကန်ဘက်က လိုချင်တဲ့စာရင်းတွေ ဖြစ်နေတယ်လို့ ဝေဖန်နေကြပါတယ်။
အီရန်ဘက်ကတော့ နျူကလီးယားအစီအစဉ်ကို အခုချက်ချင်း ဆွေးနွေးမှာမဟုတ်ဘဲ စစ်ပွဲရပ်တန့်ရေး ပိတ်ဆို့မှုတွေဖယ်ရှားရေးနဲ့ ရေလက်ကြားပြန်ဖွင့်ရေးကိုပဲ အရင်ဆုံး တိုက်ရိုက်အာမခံချက် လိုချင်နေတာပါ။
