Border News Agency
နေပြည်တော်၊ မေ ၈။
အနောက်နိုင်ငံတချို့က သူတို့အစိုးရအပေါ် စီးပွားရေးပိတ်ဆို့ပြီး ဖိအားပေးနေတာတွေကို ဒီမိုကရေစီနိုင်ငံတွေအနေနဲ့ ပြန်ဆင်ခြင်ဖို့ လိုတယ်လို့ သမ္မတတု မင်းအောင်လှိုင်က မေလ ၆ ရက်နေ့ကအစိုးရအဖွဲ့ အစည်းအဝေးမှာ ပြောဆိုလိုက်ပါတယ်။
သူတို့ကျင်းပခဲ့တဲ့ ရွေးကောက်ပွဲမှာ ပြည်သူတွေဟာ သူတို့ဆန္ဒအတိုင်း လာရောက်မဲပေးခဲ့ကြတာမို့ ဒီမိုကရေစီနည်းလမ်းကျ မဲပေးခဲ့သူတွေကို တန်ဖိုးထားရမယ်လို့ သူက ဆိုပါတယ်။
ဒါ့အပြင် စီးပွားရေး ကန့်သတ်ပိတ်ဆို့မှုတွေ ရှိနေပေမဲ့လည်းပါတီစုံဒီမိုကရေစီစနစ်နဲ့ ဖက်ဒရယ်စနစ်ကို ဆက်ပြီး တည်ဆောက်သွားမယ်လို့လည်း ကြွေးကြော်ခဲ့ပါတယ်။
သူတို့အစိုးရဟာ ပြည်သူတွေ ရွေးချယ်တင်မြှောက်ထားတဲ့ ကိုယ်စားလှယ်တွေကနေတဆင့် ပေါ်ထွက်လာတဲ့ အစိုးရဖြစ်တယ်လို့လည်း သမ္မတတုက ပုံဖော်ပြောဆိုခဲ့တာပါ။
ဒါကြောင့် နိုင်ငံ့စီးပွား တိုးတက်အောင် လုပ်ဆောင်သွားရမယ်လို့ အစိုးရအဖွဲ့ဝင်တွေကို မှာကြားခဲ့ပါတယ်။
ဒါပေမယ့် လက်တွေ့မှာတော့ အာဏာသိမ်းစစ်တပ်ရဲ့ ရွေးကောက်ပွဲကို နိုင်ငံတကာကရော ပြည်တွင်းကပါ အသိအမှတ်မပြုကြသလို စီးပွားရေး ပိတ်ဆို့မှုတွေကြောင့် စစ်တပ်နဲ့ ဆက်နွှယ်တဲ့ လုပ်ငန်းတွေဟာလည်း အကျပ်အတည်းတွေနဲ့ ရင်ဆိုင်နေရတာ ဖြစ်ပါတယ်။
နိုင်ငံရေးလေ့လာသူတွေကတော့ အခုလို သမ္မတတုက နိုင်ငံတကာကို တုံ့ပြန်ပြောဆိုနေတာဟာ သူတို့ရင်ဆိုင်နေရတဲ့ နိုင်ငံတကာ ဖယ်ကြဉ်ခံရမှုနဲ့ စီးပွားရေး ကျဆင်းမှုတွေအပေါ် ခုခံကာကွယ်ဖို့ ကြိုးစားတာပဲလို့ ရှုမြင်နေကြပါတယ်။
