Border News Agency
အိန္ဒိယ၊ မေ ၈။
အိန္ဒိယ-မြန်မာနယ်စပ် မဏိပူရ်ပြည်နယ်၊ကမ်ဂျောင်ခရိုင်ထဲကကျေးရွာတွေကို မြန်မာနိုင်ငံဘက်ကနေ နယ်စပ်ဖြတ်ကျော်ဝင်ရောက်လာတဲ့ ပြင်ပလက်နက်ကိုင်အင်အားစုတွေက အတင်းအဓမ္မတိုက်ခိုက်ခဲ့တယ်လို့ မဏိပူရ်ပြည်နယ် ဝန်ကြီးချုပ် N. Biren Singh က မေလ ၇ ရက်၊မနေ့ကစွပ်စွဲပြောဆိုလိုက်ပါတယ်။
အဲဒီတိုက်ခိုက်ခံရတဲ့ ရွာတွေကတော့ နမ်လီ (Namlee)၊ဝမ်လီ (Wanglee)နဲ့ ချိုရို (Choro) ကျေးရွာတွေဖြစ်ပြီး ဒါဟာ နယ်စပ်ဖြတ်ကျော် ကျူးကျော်တိုက်ခိုက်တဲ့ အကြမ်းဖက်မှုတခုပဲလို့ ဝန်ကြီးချုပ်က ဆိုပါတယ်။
ဒီတိုက်ခိုက်မှုတွေကြောင့် နယ်စပ်တလျှောက်မှာရှိတဲ့ ဒေသခံမျိုးနွယ်စုတွေရဲ့ လုံခြုံရေးဟာ အတော်လေး စိုးရိမ်စရာ ဖြစ်နေတယ်လို့ လည်းဆိုပါတယ်။
နယ်စပ်လုံခြုံရေးကို အရင်ကထက် ပိုပြီးတင်းကျပ်မလုပ်နိုင်သရွေ့ မဏိပူရ်ပြည်နယ်မှာ ငြိမ်းချမ်းရေးရဖို့ ခက်ခဲနေဦးမှာပဲလို့ ဝန်ကြီးချုပ်က သတိပေးထားပါတယ်။
ဒါကြောင့် ဗဟိုအစိုးရတပ်တွေရော ပြည်နယ်လုံခြုံရေးတပ်ဖွဲ့တွေကိုပါ နယ်စပ်မှာ အပြည့်အဝ တပ်ဖြန့်ထားပြီး အသင့်အနေအထား ပြင်ဆင်ထားဖို့ သူက တိုက်တွန်းထားပါတယ်။
မဏိပူရ်ပြည်နယ် မတည်မငြိမ်ဖြစ်အောင်လုပ်နေတဲ့ ဘယ်လိုအင်အားစုကိုမဆို ခွင့်လွှတ်မှာမဟုတ်ဘူးလို့ ဆိုပါတယ်။
မိမိတို့ရဲ့ မြေယာနဲ့ လူမျိုးစုအမှတ်အသားတွေကို ကာကွယ်ဖို့အတွက် ပြည်သူတွေအားလုံး စည်းစည်းလုံးလုံးနဲ့ ရပ်တည်ကြဖို့လို့တယ်လို့လည်းဆိုပါတယ်။
