Border News Agency
မူတြော်၊ မေ ၈။
ကေအဲန်ယူထိန်းချုပ်နယ်မြေ မူတြော်ခရိုင်ထဲမှာ ဆီပုံးတွေအသွင်ယူပြီး တရားမဝင် သယ်ဆောင်လာတဲ့ ဘတ် ၄၉၆ သန်းကျော် (မြန်မာငွေ ဘီလျံနဲ့ချီ)တန်ဖိုးရှိတဲ့ မူးယစ်ဆေးဝါးတွေကို မေလ ၇ ရက်နေ့ကမီးရှို့ဖျက်ဆီးလိုက်ပါတယ်။
အဲဒီမူးယစ်ဆေးဝါးတွေကို ပြီးခဲ့တဲ့ ၂၀၂၅ ခုနှစ်၊ဒီဇင်ဘာလ ၁၈ ရက်နေ့တုန်းက သံလွင်မြစ်အတိုင်း စက်လှေနဲ့ သယ်လာစဉ်မှာ ကရင်အမျိုးသားနယ်စပ်လုံခြုံရေးတပ်ဖွဲ့တွေက ဖမ်းဆီးရမိခဲ့တာပါ။
အဲဒီဆီပုံးတွေထဲမှာ ဝှက်ပြီး အူးမီထကနေ ဃိုနီထဆီ ပို့မယ့် စိတ်ကြွဆေးပြား စုစုပေါင်း ၉ သန်း ၉ သိန်းကျော်ကို ဖမ်းမိခဲ့တာ ဖြစ်ပါတယ်။
အဲဒီ မီးရှို့ဖျက်ဆီးပွဲကို ကော်သူးလေ မူးယစ်ဆေးဝါးတိုက်ဖျက်ရေးကော်မတီရဲ့ ကြီးကြပ်မှုနဲ့အတူ KNDO၊ KNLA၊ ကရင်အမျိုးသားရဲတပ်ဖွဲ့ (KNPF) နဲ့ မူတြော်ခရိုင် တာဝန်ရှိသူတွေ တက်ရောက်ခဲ့ကြပါတယ်။
ဒါ့အပြင် ထိုင်းဘက်က နယ်စပ်ရေးရာ တာဝန်ရှိသူတွေနဲ့ သတင်းမီဒီယာတွေကလည်း မီးမရှို့ခင်မှာ စစ်ဆေးအတည်ပြုချက်တွေ လုပ်ခဲ့ကြပါတယ်။
မူတြော်ခရိုင် တာဝန်ရှိသူတဦးကတော့ သံလွင်မြစ်လို နယ်စပ်ဒေသတွေမှာ မူးယစ်ဆေးဝါး သယ်ယူပို့ဆောင်တာတွေ ခဏခဏ ရှိနေတာကြောင့် စောင့်ကြည့်စစ်ဆေးတာတွေကို ပိုတိုးလုပ်နေတယ်လို့ ပြောပါတယ်။
အဲဒီဖမ်းမိထားတဲ့ မှောင်ခိုသမား နှစ်ဦးကိုလည်း ကရင်အမျိုးသားရဲတပ်ဖွဲ့က ဥပဒေအတိုင်း ဆက်လက် အရေးယူသွားမှာပါ။
ကေအဲန်ယူအနေနဲ့ သူတို့နယ်မြေအတွင်း မူးယစ်ဆေးဝါး တိုက်ဖျက်ရေးကို အရှိန်မြှင့် လုပ်ဆောင်သွားမှာဖြစ်သလို ပြည်သူတွေအနေနဲ့လည်း သံသယဖြစ်ဖွယ်တွေ့ရင် သတင်းပေးကြဖို့ တိုက်တွန်းထားပါတယ်။
