Border News Agency
တူရကီ၊ မေ ၁၀။
အမျိုးသားညီညွတ်ရေးအစိုးရ (NUG)၊ နိုင်ငံခြားရေးဝန်ကြီး ဒေါ်ဇင်မာအောင်ဟာ တူရကီနိုင်ငံမှာ ကျင်းပခဲ့တဲ့ ၁၅၂ ကြိမ်မြောက် နိုင်ငံတကာပါလီမန်ညီလာခံအတွင်း နိုင်ငံပေါင်း ၁၂ နိုင်ငံမှ ကိုယ်စားလှယ်အဖွဲ့တွေနဲ့ သီးခြားစီတွေ့ဆုံဆွေးနွေးခဲ့တယ်လို့ မေလ ၉ ရက်၊မနေ့ကထုတ်ပြန်ပါတယ်။
အဲဒီ တွေ့ဆုံပွဲမှာ အာဏာသိမ်းစစ်တပ်နဲ့သူတို့ရဲ့ တရားမဝင်အုပ်ချုပ်ရေးအဖွဲ့တွေကို တရားဝင်အသိအမှတ်မပြုဖို့ တိုက်တွန်းခဲ့တယ်လို့ ဆိုပါတယ်။
နိုင်ငံခြားရေးဝန်ကြီးဟာ ညီလာခံကာလအတွင်း ပိုလန်၊ ဆွီဒင်၊ အင်ဒိုနီးရှား၊ ဘာရိန်း၊ ဒိန်းမတ်၊ သြစတြေးလျ၊ ကနေဒါ၊ ဘူတန်၊ ယူကေ၊ အရှေ့တီမော၊ အီတလီနဲ့ ထိုင်းနိုင်ငံတို့က ကိုယ်စားလှယ်အဖွဲ့တွေနဲ့ နှစ်နိုင်ငံတွေ့ဆုံဆွေးနွေးပွဲတွေ ပြုလုပ်ခဲ့တာပါ။
အဲဒီ တွေ့ဆုံမှုတွေမှာ မြန်မာပြည်သူတွေအပေါ် အာဏာသိမ်းစစ်တပ်က ကျူးလွန်နေတဲ့ လူ့အခွင့်အရေးချိုးဖောက်မှုနဲ့ အကြမ်းဖက်မှုတွေကိုရှင်းလင်းတင်ပြခဲ့တယ်လို့ဆိုပါတယ်။
အာဏာသိမ်းစစ်တပ်ကဖွဲ့စည်းထားတဲ့ အတုအယောင်လွှတ်တော်နဲ့ တရားမဝင် ဝတ်စုံပြောင်းအုပ်ချုပ်ရေးအဖွဲ့ကို ကမ္ဘာ့ပါလီမန်အသိုက်အဝန်းအနေနဲ့ လုံးဝအသိအမှတ်မပြုဖို့ တိုက်တွန်းခဲ့တယ်လို့ဆိုပါတယ်။
တဖက်မှာလည်း ပြည်ထောင်စုလွှတ်တော်ကိုယ်စားပြုကော်မတီ (CRPH) ကို မြန်မာပြည်သူတွေရဲ့ တရားဝင်ကိုယ်စားပြုအဖြစ် ဆက်လက်အသိအမှတ်ပြုသွားဖို့ တောင်းဆိုခဲ့တာပါ။
ဒါ့အပြင် ဖယ်ဒရယ်ဒီမိုကရေစီပြည်ထောင်စု ပေါ်ထွန်းရေး ဦးဆောင်ကောင်စီ (SCEF) ရဲ့ နိုင်ငံရေးရည်မှန်းချက်တွေနဲ့ အနာဂတ်ဖက်ဒရယ်ပြည်ထောင်စု တည်ဆောက်ရေးဆိုင်ရာ ကြိုးပမ်းမှုတွေကိုလည်း မိတ်ဆက်ရှင်းလင်းခဲ့ပါတယ်။
မြန်မာပြည်သူတွေအတွက် လူသားချင်းစာနာမှု အကူအညီတွေ ဆက်လက်ရရှိရေးဟာ အရေးကြီးကြောင်းလည်း ထည့်သွင်းဆွေးနွေးခဲ့တယ်လို့ ဆိုပါတယ်။
အဲဒီအပြင်နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရတဲ့ နိုင်ငံရေးအကျဉ်းသားအားလုံး ပြန်လည်လွတ်မြောက်ရေးအတွက် နိုင်ငံတကာအသိုက်အဝန်းက အာဏာသိမ်းစစ်တပ်အပေါ် ဆက်လက်ဖိအားပေးဆောင်ရွက်ပေးဖို့ တောင်းဆိုခဲ့ပါတယ်။
