Border News Agency
ကလေး၊မေ ၁၀။
စစ်ကိုင်းတိုင်း၊ ကလေးမြို့အဝင်မှာ ပြီးခဲ့တဲ့ ဧပြီလ ၁၂ ရက်နေ့က မော်တော်ယာဉ် နှစ်စီးကို စစ်ဆေးရာကနေ ကျပ် ၃ ဒသမ ၈၅ ဘီလီယံတန်ဖိုးရှိ ဘိန်းဖြူ ၇၇ ကီလိုကို ပထမဆုံး ဖမ်းဆီးရမိခဲ့တယ်လို့ အာဏာသိမ်းစစ်တပ်က မေလ ၉ ရက်၊မနေ့ကထုတ်ပြန်ပါတယ်။
အဲဒီ ဖမ်းဆီးရမှုမှာ သက်ပိုင်စိုး၊ ဇော်ထိုက်၊ မျိုးရဲနိုင်နဲ့ ကျော်လင်းတို့ မောင်းလာတဲ့ NISSAN CONDOR နဲ့ GOLDEN TRUCK ယာဉ်တွေပေါ်ကနေ ဘိန်းဖြူ ၄၈ ဒသမ ၄ ကီလိုကို အရင်တွေ့ရှိခဲ့တာလို့ဆိုပါတယ်။
အဲဒီအပြင် ကလေးမြို့၊ စက်မှုဇုန်သွားလမ်းမှာ ခိုင်လင်းဇော်နဲ့ နေလင်းဦးမောင်းလာတဲ့ NISSAN CONDOR ယာဉ်ပေါ်ကနေ ဘိန်းဖြူ ၂၈ ဒသမ ၆ ကီလိုကို ထပ်မံသိမ်းဆည်းရမိခဲ့လို့ စုစုပေါင်း ဘိန်းဖြူ ၇၇ ကီလိုအထိ ရှိခဲ့တယ်လို့ဆိုပါတယ်။
နောက်ပြီး မူးယစ်ဆေးဝါး လက်ခံမယ့်သူ ညွန့်တင်ကို ကလေးမြို့အဝင်မှာ ဖမ်းမိခဲ့သလို ရှမ်းပြည်မှကလေးမြို့ကို မူးယစ်ဆေးဝါးတွေ သယ်ခိုင်းတဲ့ ခိုင်ဝင်းကိုလည်း ပဲခူးတိုင်း၊ ပြည်မြို့နယ်မှာ TOYOTA HILUX ယာဉ်တစီးနဲ့အတူဖမ်းဆီးနိုင်ခဲ့တယ်လို့ဆိုပါတယ်။
အဲဒီအပြင်ဧပြီလ ၃၀ ရက်နေ့မှာလည်း မန္တလေးတိုင်း၊စဥ်ကိုင်မြို့နယ်မှ ဘဂျမ်းကို ထပ်မံဖမ်းမိခဲ့ပြီးသူ့ရဲ့ထွက်ဆိုချက်အရ ပြည်ကြီးတံခွန်မြို့နယ်ရှိ NISSAN CONDOR ယာဉ်ပေါ်ကနေ ကျပ် ၆ ဘီလီယံတန်ဖိုးရှိ စိတ်ကြွဆေးပြား ၄ သန်းကို ထပ်မံသိမ်းဆည်းရမိခဲ့တယ်လို့လည်းဆိုပါတယ်။
အဲဒီ ဖမ်းမိသူတွေကို ဥပဒေအရ အရေးယူထားသလို ကွင်းဆက်တရားခံတွေကိုလည်း ဆက်လက်စုံစမ်းနေတယ်လို့ဆိုပါတယ်။
