Border News Agency
အမေရိကန်၊ ဇွန် ၁၅။
အမေရိကန်နဲ့အီရန်တို့ဟာ ဖြစ်ပွားနေတဲ့စစ်ပွဲကို အဆုံးသတ်ဖို့အတွက် တရားဝင်သဘောတူညီမှုရရှိသွားပြီလို့ နှစ်နိုင်ငံစလုံးက ဇွန်လ ၁၄ ရက်၊ ညပိုင်းမှာ အသီးသီး ကြေညာခဲ့ပါတယ်။
အဲဒီသဘောတူညီချက်အရ လက်ဘနွန်အပါအဝင် ဒေသတွင်းတိုက်ခိုက်မှုအားလုံးကို ချက်ချင်းရပ်တန့်သွားမှာဖြစ်ပြီး လာမယ့် ဇွန်လ ၁၉ ရက်နေ့ ဆွစ်ဇာလန်နိုင်ငံမှာစစ်ပြေငြိမ်းရေးနားလည်မှုစာချွန်လွှာ (MoU) ကို လက်မှတ်ရေးထိုးဖို့ စီစဉ်ထားပါတယ်။
သမ္မတထရမ့်က အီရန်နဲ့ ညှိနှိုင်းမှုတွေ အားလုံးပြီးမြောက်ပြီဖြစ်ကြောင်း အတည်ပြုခဲ့ပြီး အီရန်ဘက်ကပိတ်ဆို့ထားတဲ့ ဟော်မုဇ်ရေလက်ကြားကို အတားအဆီးမရှိ ပြန်လည်ဖွင့်လှစ်ပေးဖို့ အမေရိကန်က အီရန်ဆိပ်ကမ်းတွေကို ပိတ်ဆို့ထားတာ ဖယ်ရှားပေးဖို့နဲ့အေးခဲထားတဲ့ အီရန်ပိုင်ဆိုင်မှု ဒေါ်လာ ၂၄-၂၅ဘီလီယံလောက်ကို ပြန်လည်လွှတ်ပေးဖို့ အဓိကသဘောတူညီခဲ့ကြတာပါ။
ဒီသတင်းကြောင့် ကမ္ဘာ့ရေနံစျေးနှုန်းတွေဟာ ချက်ချင်း ၄ ရာခိုင်နှုန်းအထိ ကျဆင်းသွားခဲ့ပါတယ်။
နောက်ထပ် ရက်ပေါင်း ၆၀ အတွင်းမှာတော့ အီရန်ရဲ့ နျူကလီးယားအစီအစဉ်တွေကို ရပ်စိုင်းရေး၊ သန့်စင်ပြီးသားယူရေနီယမ်တွေကို လွှဲပြောင်းပေးရေးနဲ့ စီးပွားရေးပိတ်ဆို့မှုတွေကို အပြီးသတ်ဖြေလျှော့ပေးရေးအတွက် တရားဝင်စစ်ပြေငြိမ်းရေးစာချုပ်ချုပ်ဆိုနိုင်ဖို့ ဆက်လက်ဆွေးနွေးသွားမှာဖြစ်ပါတယ်။
ဆွေးနွေးမှုနောက်ဆုံးအဆင့်မှာ အစ္စရေးကဘေရွတ်ကိုတိုက်ခိုက်ခဲ့တာကြောင့် အခက်အခဲရှိခဲ့ပေမဲ့နှစ်ဖက်စလုံးက ထိန်းသိမ်းနိုင်ခဲ့တာကြောင့် ငြိမ်းချမ်းရေးလမ်းကြောင်း ပျက်စီးမသွားခဲ့ပါဘူး။
သမ္မတထရမ့်ကတော့ အစ္စရေးဝန်ကြီးချုပ်နေတန်ယာဟုနဲ့ သဘောထားကွဲလွဲမှုတချို့ ရှိခဲ့ပေမယ့် အစ္စရေးကိုနျူကလီးယားခြိမ်းခြောက်မှုကနေ ကယ်ထုတ်ပေးခဲ့တဲ့အတွက် သူကျေးဇူးတင်သင့်တယ်လို့ ဆိုပါတယ်။
လက်ရှိအချိန်ထိတော့ အစ္စရေးဘက်က ဒီသဘောတူညီချက်နဲ့ပတ်သက်ပြီး တရားဝင်မှတ်ချက်ပေးတာမရှိသေးဘဲ သူတို့နဲ့တိုက်ရိုက်ပတ်သက်မှု မရှိဘူးလို့သာ အရင်ကတည်းက တုံ့ပြန်ထားတာဖြစ်ပါတယ်။
