Border News Agency
တောင်ကိုးရီးယား၊ဇွန် ၁၅။
တောင်ကိုရီးယားနိုင်ငံ၊ဆိုးလ်မြို့မှာ ဇွန်လ ၁၄ ရက်နေ့က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ၈၁ နှစ်ပြည့်မွေးနေ့ကို ဂုဏ်ပြုတဲ့အနေနဲ့ “သက်ရှိထင်ရှား သက်သေပြပါ” (Proof of Life) ကမ်ပိန်း ဆန္ဒပြပွဲတခုကို ပြုလုပ်ခဲ့ပါတယ်။
အဲဒီပွဲကို ကိုရီးယားအခြေစိုက် တော်လှန်ရေးအဖွဲ့တွေနဲ့အတူ ပြည်သူ ၂၀၀ ခန့် ပါဝင်ခဲ့ကြတာပါ။
ဆန္ဒပြသူတွေက ဒေါ်အောင်ဆန်းစုကြည် သက်ရှိထင်ရှား ရှိ၊ မရှိ ခိုင်လုံတဲ့ အထောက်အထားကို အာဏာသိမ်းစစ်တပ်က နိုင်ငံတကာကို ချပြဖို့၊ မိသားစုနဲ့ ဆက်သွယ်ခွင့်ပေးဖို့နဲ့ နိုင်ငံရေးအကျဉ်းသားအားလုံးကို ခြွင်းချက်မရှိ ပြန်လွှတ်ပေးဖို့ တောင်းဆိုခဲ့ကြပါတယ်။
ဒီကိစ္စနဲ့ ပတ်သက်ပြီး ကိုရီးယားအစိုးရနဲ့ လွှတ်တော်တို့ကနေတဆင့် အာဏာသိမ်းစစ်တပ်ကိုဖိအားပေးဖို့ အိတ်ဖွင့်ပေးစာတစောင်ကိုလည်း ကြိုတင်ပေးပို့ထားပါတယ်။
အဲဒီပွဲမှာ မြန်မာပြည်သူတွေဟာ စစ်အာဏာရှင်စနစ် အမြစ်ပြတ်ရေးအတွက် ဒူးမထောက်ဘဲ ဆက်လက်တော်လှန်နေဦးမှာဖြစ်ကြောင်း၊ NUG အစိုးရနဲ့ တော်လှန်ရေးအဖွဲ့အစည်းတွေရဲ့ ဦးဆောင်မှုတွေကိုလည်း ဆက်လက်ထောက်ခံ ပူးပေါင်းသွားမယ်လို့လည်းဆိုပါတယ်။
