Border News Agency
လက်ဘနွန်၊ဇွန် ၁၅။
လက်ဘနွန်နိုင်ငံ၊ ဘေရွတ်မြို့တောင်ပိုင်းရှိ ဒါဟီယေ (Dahiyeh) ခရိုင်ကို ဇွန်လ ၁၄ ရက်နေ့ကအစ္စရေးစစ်တပ်က လေကြောင်းတိုက်ခိုက်ခဲ့ပါတယ်။
အဲဒီတိုက်ခိုက်မှုကြောင့် အနည်းဆုံး လူ ၃ ဦး သေဆုံးပြီး ၆ ဦး ဒဏ်ရာရရှိခဲ့တယ်လို့ လက်ဘနွန် အရပ်ဘက်ကာကွယ်ရေးအဖွဲ့က အတည်ပြုပြောပါတယ်။
အစ္စရေးဘက်ကတော့ ဟစ်ဇ်ဘိုလာအဖွဲ့ရဲ့ ပစ်ခတ်မှုတွေကို တုံ့ပြန်တာလို့ ဆိုပါတယ်။ အခုလိုအရှိန်အဟုန်မြင့်လာတဲ့ စစ်ရေးတင်းမာမှုတွေကြောင့် အမေရိကန်နဲ့ အီရန်ကြား ချုပ်ဆိုဖို့ နီးစပ်နေတဲ့ ငြိမ်းချမ်းရေးစာချုပ်အပေါ် ကြီးမားတဲ့ သက်ရောက်မှု ရှိလာမှာကို စိုးရိမ်နေကြပါတယ်။
အမေရိကန်သမ္မတ ဒေါ်နယ်ထရမ့်က စာချုပ်ကို ဒီနေ့ပဲ သဘောတူညီဖို့ မျှော်လင့်ထားပေမဲ့ အီရန်ဘက်ကတော့ စာချုပ်လက်မှတ်ထိုးဖို့အတွက် အချိန်နည်းနည်း လိုသေးတယ်လို့ ဆိုပါတယ်။
အီရန်နိုင်ငံခြားရေးဝန်ကြီးကတော့ လက်ဘနွန်အပေါ် အစ္စရေးရဲ့ စစ်ရေးအရ တိုက်ခိုက်မှုတွေကို သည်းခံမှာမဟုတ်ကြောင်းနဲ့ ဒါဟာ သူတို့အတွက် “အနီရောင်မျဉ်း” ဖြစ်ကြောင်း ထုတ်ဖော်ပြောကြားထားပါတယ်။
အရင်တပတ်ကလည်း အစ္စရေးရဲ့ ဘေရွတ်တိုက်ခိုက်မှုအပေါ် အီရန်က ဒုံးကျည်တွေနဲ့ တုံ့ပြန်ခဲ့ဖူးတဲ့အတွက် လက်ရှိအခြေအနေက အတော်လေးကို အထိအခိုက်မခံတဲ့ အနေအထား ဖြစ်နေပါတယ်။
တဖက်မှာလည်း အစ္စရေးစစ်တပ်က လက်ဘနွန်တောင်ပိုင်းရှိ မြို့ ၂၉ မြို့က ဒေသခံတွေကို နေရာရွှေ့ပြောင်းဖို့ အမိန့်ထုတ်ထားပါတယ်။
အစ္စရေးဝန်ကြီးချုပ် နေတန်ယာဟုကတော့ ဟစ်ဇ်ဘိုလာအနေနဲ့ သူတို့မြို့တွေကို ပစ်ခတ်တာ မရပ်တန့်သရွေ့ အစ္စရေးအနေနဲ့ ဘေရွတ်မှာရှိတဲ့ ပစ်မှတ်တွေကို ဆက်လက်တိုက်ခိုက်သွားမယ်လို့ ပြောဆိုထားပါတယ်။
ငြိမ်းချမ်းရေးစာချုပ်နဲ့ ပတ်သက်ပြီး စိုးရိမ်မှုတွေ တိုးပွားနေတာကတော့ အရင်တုန်းက အမေရိကန်နဲ့ အီရန် အပစ်အခတ်ရပ်စဲရေး သဘောတူခဲ့တဲ့အချိန်မှာတောင် အစ္စရေးက ဒီစာချုပ်မှာ ပါဝင်တာမရှိတဲ့အတွက် လက်ဘနွန်ကို ဆက်လက်တိုက်ခိုက်ခဲ့တဲ့ သာဓကတွေ ရှိနေလို့ပါပဲ။
လက်ရှိမှာတော့ ကာတာနိုင်ငံက ကိုယ်စားလှယ်အဖွဲ့တွေက တင်းမာမှုတွေကို လျော့ကျစေဖို့ ကြားဝင်ညှိနှိုင်းပေးနေပါတယ်။
